‘स्टार्टअप र लिडरसिप’ सत्रमा CNIYEF अध्यक्ष प्रधानले बाँडे प्रेरक दृष्टिकोण

इटहरी : बदलिँदो विश्वव्यापारिक परिवेशमा विद्यार्थीहरूलाई व्यावहारिक सीप र नेतृत्व क्षमतामा सशक्त बनाउने उद्देश्यका साथ इटहरी इन्टरनेशनल कलेजले अतिथि व्याख्यान तथा मेन्टरसिप सत्रहरूको नयाँ श्रृङ्खला सुरु गरेको छ।

यो पहलले कलेजका ब्याचलर अफ बिजनेस एडमिनिस्ट्रेशन (BBA) विद्यार्थीहरूलाई वास्तविक उद्योगको अनुभवसँग जोड्ने र शैक्षिक शिक्षालाई व्यावहारिक अभ्यासमा रूपान्तरण गर्ने नयाँ संस्कार विकास गरेको छ।

२०२५/२६ शैक्षिक सत्रका लागि विशेष रूपमा सुरु गरिएको यो कार्यक्रम विज्ञापन तथा मार्केटिङ,अन्तर्राष्ट्रिय व्यवसाय, र डिजिटल व्यवसाय व्यवस्थापन जस्ता विशेषीकरणका विद्यार्थीहरूलाई लक्षित गरिएको हो।

कार्यक्रमका विषयवस्तुहरू कलेजका प्रोग्राम लिडरद्वारा गहिरो अध्ययन र अनुसन्धानपछि छनोट गरिन्छन्। त्यसपछि ती विषयहरू कलेज प्रशासनले स्वीकृत गरी पाठ्यक्रमसँग सुसङ्गत बनाइन्छ।

चालु शैक्षिक सत्रका लागि छनोट गरिएका केही प्रमुख विषयहरूमा “Startup and Leadership: Entrepreneurial Empowerment”,“My Life and Corporate Behavior” लगायतका शीर्षकहरू समावेश छन्, जसले कक्षा भित्रको सिद्धान्तलाई वास्तविक व्यावसायिक चुनौतीहरूसँग जोड्ने काम गर्छ।

श्रृङ्खलाको पहिलो सत्र ‘Startup and Leadership’ शीर्षकमा सम्पन्न भएको थियो, जसमा अतिथि वक्ताका रूपमा मरुती ग्यास प्रा.लि.का प्रमुख कार्यकारी अधिकृत (CEO) तथा CNIYEF कोशीका अध्यक्ष सुशन प्रधान उपस्थित थिए।

युवा उद्यमीका रूपमा परिचित प्रधानले आफ्ना संघर्ष, सीप र दृष्टिकोण विद्यार्थीहरूसँग साझा गर्दै असफलतालाई अवसरका रूपमा लिन र निरन्तर सिकाइको मानसिकता विकास गर्न प्रेरित गरे।

प्रधानले भने, “व्यवसाय केवल सञ्चालन होइन, रूपान्तरण हो—प्रणाली र प्रविधिको सहकार्यबाट।” उनले पारिवारिक व्यवसायलाई दिगो र प्रविधिमैत्री उद्यममा रूपान्तरण गरेको अनुभव सुनाउँदै नेतृत्वमा नवीन सोच, इमानदारी र दृढताको महत्व व्याख्या गरे।

CNIYEF कोशीका अध्यक्षका रूपमा प्रधानले Startup Mentoring Program, Pitch Fest, IT Summit र Venture Collaboration जस्ता गतिविधिहरूमार्फत कोशी प्रदेशमा स्टार्टअप संस्कृतिको विकासमा योगदान दिइरहेको उल्लेख गरे।

साथै उनले सरकारद्वारा सुरु गरिएको Startup Loan Program लाई युवाका लागि “विश्वास र अवसरको नयाँ ढोका” भनेर मूल्याङ्कन गरे। उनले सन्देश दिए, “अवसर पर्खिनु होइन, सिर्जना गर्नु हो।

तपाईंको सानो इमानदार प्रयास पनि देशको विकासको हिस्सा बन्न सक्छ।”कलेजका अनुसार, यस्ता सत्रहरूले विद्यार्थीहरूलाई शैक्षिक सीमाभन्दा पर गएर वास्तविक जीवनका नेतृत्व, उद्यमशीलता र व्यवसायिक व्यवहारमा सक्षम बनाउने दिशा लिएका छन्।

कलेजले आगामी दिनहरूमा पनि यस्ता प्रेरणादायी सत्रहरू निरन्तरता दिँदै युवा पुस्तालाई विश्वव्यापी प्रतिस्पर्धाका लागि तयार पार्ने लक्ष्य लिएको जनाएको छ।