विराटनगर : मोरङको बूढीगंगामा रोकेर राखेको म्याजिक भेनमा अचानक आगलागी भएको छ । आगलागीबाट भेन पूर्णरूपले क्षतिग्रस्त बनेको छ ।
बूढीगंगा गाउँपालिका–२ मुस्लिम टोलमा प्रदेश १–०२–००१ ज ३९४१ नम्बरको भेनमा राति ८ बजेतिर आगलागी भएको मोरङ प्रहरीका प्रवक्ता डीएसपी वेदप्रकाश जोशीले जानकारी दिए ।
उनका अनुसार धनी एवं चालक सुनसरीको दुहबी नगरपालिका–२ का ४६ वर्षीय अजुवा मियाँले ल्याएर बूढीगंगा–२ स्थित छोरी रोजितनी खातुनको घरको अगाडि भेन रोकेर राखेका थिए ।
रोकेर राखेकै ठाउँमा अचानक आगलागी भएको जानकारी प्रहरीले प्राप्त गरेको थियो । आगलागीको जानकारी पाउनसाथ अनुसन्धानका लागि प्रहरी घटनास्थल पुगेको थियो ।
जिल्ला प्रहरी कार्यालय मोरङबाट इन्स्पेक्टर दीपक लिम्बू र इलाका प्रहरी कार्यालय नेमुवाबाट सइ प्रवीण खड्काको नेतृत्वमा खटिएको टोलीले स्थानीयको सहयोगमा आगो नियन्त्रणमा लिएको डीएसपी जोशीले बताए ।
उनका अनुसार आगलागीबाट भेनको इन्जिन, सीट र बडीको भाग जलेर क्षति पुगेको छ । आगलागीमा ७ लाखभन्दा बढीको क्षति भएको हुनसक्ने प्रहरीको प्रारम्भिक अनुमान छ । आगलागीको कारण थाहा नभएको र घटनाको अनुसन्धान सुरु गरिएको जानकारी जोशीले दिए ।
Discussion about this post