विराटनगर । चौथो विद्यालयस्तरीय बास्केटबल प्रतियोगितामा विराटनगरको बिकेभीएम स्कुल विजेता बनेको छ । एभरेष्ट स्कुल उपविजेता बनेको छ ।
विराटनगर बास्केटबल एकेडेमीले आयोजना गरेको प्रतियोगितामा बिकेभिएमले विराटनगरको एभरेष्ट स्कुललाई २ अंकको अन्तरमा हराउँदै उपाधि जितेको हो।
बिकेभिएमले लगातार दोस्रो पटक उपाधि जितेको छ ।
प्रतिस्पर्धात्मक खेलमा बिकेभिएमले ३९ अंक बनाउँदा एभरेष्ट ३७ अंक बनाएको थियो। व्यक्तिगत २० अंक बनाएका बिकेभिएमका आकाश चौधरीले म्यान अफ द म्याच घोषित हुनुभयो भने लिगकै मस्ट भ्यालुएबल खेलाडी एभरेष्टका शिव साह भए ।
लिगमा उत्कृष्ठ प्रदर्शन गर्ने बिकेभिएमका सन्तोष साह उदयीमान खेलाडी घोषित भए ।
तेस्रो स्थानका लागि भएको खेलमा पोखरिया स्कुललाई ३८–२२ अंकले पराजित गर्दै सगरमाथा स्कुल विजयी भयो। सगरमाथाका उत्सव कार्की म्यान अफ द म्याच घोषित भए ।
कार्यक्रमका प्रमुख अतिथि कोशी प्रदेशसभा सदस्य भीम पराजुली, कोशी प्रदेश बास्केटबल संघका अध्यक्ष मनिष गुरुङलगायतले खेलाडीहरुलाई शुभकामना दिँदै पुरस्कार प्रदान गरे ।
भदौ १५ गतेदेखि विराटनगरमा होम एण्ड अवे अन्तर्गत लिग खेल भएको थियो। प्रतियोगितामा विराटनगरका एभरेष्ट, बिकेभिएम, सगरमाथा, पोखरिया, अरनिको, सेन्ट जोसेफ, डिपिएस र डनबस्को स्कुलले सहभागिता जनाएका थिए ।
Discussion about this post