मुक्ति समाजको ३६ औँ स्थापना दिवसका अवसरमा नेता द्वय नेपाली र पोर्तेल पुरस्कृत 

विराटनगर । नेपाली दलित आन्दोलनका अग्रज व्यक्तित्व खेम नेपाली र सोम पोर्तेल पुरस्कृत भएका छन् ।

मङ्गलवार नेपाल उत्पीडित जातीय मुक्ति समाज कोसी प्रदेश कमिटीले नेपाली दलित आन्दोलनका अग्रज व्यक्तित्व नेपाली र पोर्तेललाई पुरस्कृत गरेको हो ।

नेपाल उत्पीडित जातीय मुक्ति समाजको ३६ औँ स्थापना दिवसको अवसरमा विराटनगरमा आयोजित कार्यक्रममा नगद सहित नेपालीलाई भद्रमान घले स्मृति सम्मान पुरस्कार र पोर्तेललाई नवराज शङ्कर स्मृति युवा प्रोत्साहन पुरस्कार प्रदान गरिएको हो ।

पुरस्कार नेकपा एमालेका महासचिव शङ्कर पोखरेल, मुक्ति समाज केन्द्रीय कमिटी अध्यक्ष मनोहर विश्वकर्मा र कोसी प्रदेश अध्यक्ष उमेश विश्वकर्मालगायतले वितरण गरे ।

पुरस्कृत अभियन्ता नेपाली मुक्ति समाज केन्द्रीय कमिटीका महासचिव, नेकपा (एमाले) कोसी प्रदेश कमिटी पूर्व जनसङ्गठन समन्वय संयन्त्र प्रमुख एवम् राष्ट्रियसभाका पूर्व सांसद हुन् ।

पोर्तेल मुक्ति समाज केन्द्रीय कमिटी सचिव, नेकपा (एमाले) कोसी प्रदेश कमिटी सदस्य तथा जिल्ला समन्वय समिति झापाका पूर्व प्रमुख हुन् ।

मुक्ति समाजको स्थापना दिवसको अवसर पारेर केन्द्रीय कमिटीले आयोजना गरेको कार्यक्रममा कोसी प्रदेश कमिटीले स्थापना गरेको सो पुरस्कार उनीहरूलाई वितरण गरिएको हो ।

कार्यक्रममा नेकपा एमाले स्थायी कमिटी सदस्य गुरु बराल, कोसी प्रदेशका पूर्व मुख्यमन्त्री हिकमत कार्की, नेकपा एमाले स्थायी कमिटी सदस्य डा. शिवमाया तुम्बाहाम्फे, केन्द्रीय सदस्य जीवन घिमिरे, रामलाल साह, कोसी प्रदेश अध्यक्ष घनश्याम खतिवडा, पूर्व केन्द्रीय सदस्य विनोद ढकाल, मोरङ अध्यक्ष ऋषिकेश पोखरेल, उपाध्यक्ष बाबुराम कार्की, नेपाल खेलकुद महासङ्घका केन्द्रीय अध्यक्ष परशुराम बस्नेत, मुक्ति समाजका उपाध्यक्ष एवम् प्रदेश कमिटी इन्चार्ज अनुभूति बम नेपालीलगायत कोसी प्रदेशका अधिकांश जिल्लाबाट मुक्ति समाजका सयौँ नेता कार्यकर्ताहरूको उपस्थिति रहेको थियो ।

मङ्गलवार देश व्यापीरुपमा मुक्ति समाजको ३६ औँ स्थापना दिवस मनाइएको छ । यसपटक मोरङमा केन्द्रीय कमिटीको आयोजनामा स्थापना दिवस मनाइएको मुक्ति समाज मोरङका अध्यक्ष किशोर विश्वकर्माले जानकारी दिए ।