काभ्रे । काभ्रेमा आमाको हत्या आरोपमा प्रहरीले छोरालाई पक्राउ गरेको छ ।
रोशी गाउँपालिका–३ भञ्ज्याङगाउँ बस्ने ६९ वर्षीया माइली लामाको हत्या आरोपमा प्रहरीले २८ वर्षीय छोरा फुर्साङ लामालाई पक्राउ गरेको हो । कात्तिक १६ गते अपराह्न सवा ४ बजे माइली आफ्नो घरको भान्सामा मृत फेला परेकी थिइन् ।
उनी मृत फेला परेको खबरपछि इलाका प्रहरी कार्यालय मंगलटार र जिल्ला प्रहरी कार्यालय काभ्रेबाट टोली खटिएर अनुसन्धान थालेको थियो । तालिम प्राप्त कुकुर पनि खटाएर अनुसन्धान अघि बढाएको थियो ।
प्रहरीले तत्कालै मृतकका कान्छा छोरा फुर्साङलाई पक्राउ गरी सोधपुछ थालेको जिल्ला प्रहरी कार्यालय काभ्रेका डिएसपी मिनबहादुर घलेले जानकारी दिए ।
फुर्साङले कोठामा सुतिरहेकी आमाको सुनको रिङ र नगदको लोभले सिलौटोले हानेर अचेत बनाएको प्रहरीले जनाएको छ । अचेत बनेकी आमालाई पुनः आग्लो प्रहार गरी हत्या गरेको आरोप उनीमाथि छ ।
घटनापछि उनी सुनको रिङ र नगद लिएर फरार भएका थिए । उनलाई आइतबार प्रहरीले पक्राउ गरेको हो । प्रहरीले घटनाबारे थप अनुसन्धान गर्न जिल्ला अदालतबाट ७ दिन हिरासतमा राख्न अनुमति पाएको छ ।
Discussion about this post