पाँचथर : पाँचथरको फिदिम नगरपालिका २ साम्दिनमा आगलागी हुँदा एउटा घर जलेको छ ।घटनामा एकजना घाइते भएका छन् ।
मंगलबार अपराह्न सवा ४ बजे आगलागी हुँदा ६२ वर्षीय जयप्रकाश राई गम्भीर घाइते भएको जिल्ला प्रहरी कार्यालय पाँचथरका सूचना अधिकारी (प्रहरी निरिक्षक)बेनिलाल साहले जानकारी दिए ।
आगलागी भएको घर स्थानीय कुमारी राईको रहेको प्रहरीले जनाएको छ ।
बिरामी अवस्थाका जयप्रकाश घरमा आगो लाग्दा जलेको र अवस्था गम्भीर रहेकाले पाँचथर अस्पतालमा उपचार सम्भव नभएपछि झापातर्फ पठाइएको साहले बताए ।
आगलागीको कारण खुल्न नसकेपनि घरभित्रको ग्याँस पड्किएकाले ग्यास लिक भएरै आगो लागेको हुनसक्ने प्रारम्भिक अनुमान गरिएको प्रहरीले जनाएको छ ।
आगो स्थानीयबासी, नेपाल आर्मी, नेपाल प्रहरी र सशस्त्र प्रहरीसहित फिदिम नगरपालिकाका दुईवटा दमकलको सहयोगले नियन्त्रणमा लिइएको छ । आगलागीबाट भएको क्षतिको विवरण आउन समय लाग्ने प्रहरीले जनाएको छ ।
Discussion about this post