बिपी प्रतिष्ठानका पूर्व विद्यार्थीहरूको ३० वर्षपछि पहिलो पटक धरानमा सम्मेलन हुँदै

धरान । उपत्यका बाहिर पहिलो पटक चिकित्सा शिक्षा अध्ययन गर्न सुरु गरेको बिपी कोइराला स्वास्थ्य विज्ञान प्रतिष्ठान धरानमा अध्ययन गरेका विद्यार्थीहरू अहिले नेपालका विभिन्न प्रतिष्ठान सँगै विदेशका अस्पतालहरूको नेतृत्व गरिरहेका छन् ।

प्रतिष्ठानको स्थापन भएको ३० वर्षमा प्रतिष्ठानको विकास भने जस्ताको तस्तै छ ।

यसको विकास तथा प्रवर्द्धन तथा अनुभव आदान प्रदान गर्न उद्देश्यले प्रतिष्ठानका अध्ययन गरेका पूर्व विद्यार्थीहरू पहिलो पटक भेला हुने भएका छन् ।

पूर्व विद्यार्थी सङ्घ गठन गर्दै उनीहरूले प्रतिष्ठानको स्थापनाको ३० वर्ष पछि पहिलो पटक पूर्व विद्यार्थी सम्मेलन गर्न लागेका हुन् ।

प्रतिष्ठानमा आइतबार कार्तिक २५ गते हुने सम्मेलनमा प्रतिष्ठानको मात्र नभई देशकै प्रतिष्ठानहरू तथा चिकित्सा क्षेत्रको विकास , अध्ययन अनुसन्धानको बारेमा समेत छलफल हुने पूर्व विद्यार्थी सङ्घका महासचिव एडिसनल प्रोफेसर डाक्टर विकास साहले जानकारी दिए ।

‘सम्मेलनमा प्रतिष्ठानको विकास सँगै चिकित्सकहरूको समस्याहरू सँगै अनुभव आदान प्रदान हुनेछ’ उनले भने ‘विदेशमा विभिन्न विश्वविद्यालय छात्रवृत्तिबाट अध्ययन तथा अनुसन्धान गर्न जाने चिकित्सकहरूलाई त्यहाँ रहेका पूर्व विद्यार्थीहरूले सहजीकरण गर्ने छन् ।’

प्रतिष्ठानमा अध्ययन गरेका २ जना चिकित्सकहरूले नेपालका दुई प्रतिष्ठानको नेतृत्व गरिरहेका छन् ।

भारतको एम्स मेडिकल कलेजको अवधारणामा नेपालमै पहिलो पटक धरानमा चिकित्सा शिक्षा अध्ययन , अनुसन्धान तथा विशेषज्ञ उपचार गर्ने उद्देश्यले पहिलो प्रतिष्ठानको रूपमा बिपी कोइराला स्वास्थ्य विज्ञान प्रतिष्ठानको स्थापना भएको थियो ।

प्रतिष्ठानका पूर्व विद्यार्थी डाक्टर मङ्गल रावल कर्णाली स्वास्थ्य विज्ञान प्रतिष्ठानको उपकुलपतिको रूपमा काम गरिरहेका छन् भने मधेस स्वास्थ्य विज्ञान प्रतिष्ठानमा समेत बिपी कै विद्यार्थी डाक्टर अङ्कुर शाह उपकुलपति भएर काम गरी रहेका छन् ।

त्यसो त कर्णालीका शिक्षा अअध्यक्ष डाक्टर डवल राज धामी , निर्देशक डाक्टर पूजन रोकाया पनि बिपीकै उत्पादन हुन् ।

राप्ती स्वास्थ्य विज्ञान प्रतिष्ठानका रजिष्टार प्राध्यापक श्याम लम्साल तथा मेडिकल काउन्सिल का रजिस्ट्रार डाक्टर सितस देव पनि प्रतिष्ठानकै उत्पादन हुन् भने बिपी का अस्पताल निर्देशक डा जगत नारायण पनि यहीका उत्पादन हुन् ।

यो सँगै बिपीको अध्ययन गरेका विद्यार्थीहरू भारतका विभिन्न अस्पताल सँगै अमेरिका , क्यानडा,लगायतका देशका अस्पतालहरूमा समेत नेतृत्वदायी भूमिकामा रहेको सङ्घका अध्यक्ष प्राध्यापक डाक्टर रोविन मास्केले बताए ।

सम्मेलनले प्रतिष्ठानको सँगै देशकै चिकित्सा शिक्षा क्षेत्रमा देखिएका विकृति विसङ्गतिको अन्त्य गर्न महत्त्वपूर्ण सहयोग सङ्घले जनाएको छ ।