विराटनगर । मोरङको रंगेलीमा ट्याक्टरले ठक्कर दिँदा शुक्रबार बिहान एक जना वृद्ध पुरुषको मृत्यु भएको छ ।
ट्याक्टरको ठक्करबाट रंगेली नगरपालिका–८ का ६८ वर्षीय नारायण राजवंशीको मृत्यु भएको हो । भित्री सडकखण्ड हुँदै पूर्वबाट पश्चिमतर्फ गइरहेको ना ६ त ५४९ नम्बरको ट्याक्टरले पैदल हिँडिरहेका राजवंशीलाई रंगेली नगरपालिका–८ दर्वेसामा ठक्कर दिएको थियो ।
ट्याक्टरले बिहान ११ः२० बजेतिर ठक्कर दिँदा उनको घटनास्थलमै मृत्यु भएको मोरङ प्रहरीका प्रवक्ता डीएसपी रन्जनकुमार दाहालले जानकारी दिए । उनका अनुसार शवलाई पोस्टमार्टमका लागि रंगेली अस्पतालमा राखेर घटनाको अनुसन्धान थालिएको छ ।
घटनालगत्तै ट्याक्टर चालक मोरङको धनपालथान गाउँपालिका–४ का अन्दाजी २६ वर्षीय अजय चौधरी फरार भएका छन् । उनको खोजी जारी राखिएको र ट्याक्टर तथा सहचालक रंगेली–२ का अन्दाजी ३६ वर्षीय मोहमद अमिरलाई नियन्त्रणमा लिइएको प्रहरीले जनाएको छ ।
Discussion about this post