कोठा खोज्ने बहानामा सुनचाँदीका गरगहना चोरी

इलाम : कोठा भाडामा खोज्ने बहानामा सुनचाँदीका गरगहना चोरी गर्ने एक जना भारतीय नागरिकलाई प्रहरीले पक्राउ गरेको छ ।

इलामको सूर्योदय नगरपालिका १० का ४७ वर्षीय हेमकुमार श्रेष्ठको घरमा कोठा खोज्ने बहानामा आएका दार्जिलिङका ३० वर्षीय देवब्रत रायले घरको कोठा भित्र गएर दराज खोली दराजभित्र रहेको सुन, चाँदी र नगद चोरी गरी भाग्दै गरेको अवस्थामा पक्राउ गरिएको हो ।

स्थानीयबासी र प्रहरी चौकी फिक्कलबाट खटिएको प्रहरी टोलीले उनलाई नियन्त्रणमा लिएको हो ।

पक्राउ परेका उनको साथबाट चोरी भएका सुनका विभिन्न प्रकारका गरगहना ६ तोला ८ सय ५ ग्राम, चाँदीका गरगहना १० तोला ८१ लाल र नगद नौ हजार बरामद गरेको हो ।

चोरीको सामानसहित पक्राउ परेका उनको जिल्ला प्रहरी कार्यालय इलामबाट थप अनुसन्धान भइरहेको प्रहरीले जनाएको छ ।