बा र आमाहरू

बाहरू

एकादेशमा ‘बा’ हरू थिए
ती नालापानीको किल्लामा भेटिन्थे
पछि आमाले धोइदिएको इष्टकोटमा भेटिए
अनि कथामा हराए बाहरू
गीतमा हराए
अलिपछि
पालेको जुँगामा हल्लिएको देखेँ बाहरू
खौरिएको जुँगाको टुडोमा देखेँ बाहरू

हेर्दा हेर्दै सिंहदरबारबाट तलतल झरे बाहरू
कहाँ हराएछन् भनी लेन्स लाएँ आँखामा
क्या अचम्म!
काठमाडौँको सडकमा
देख्दैछु
‘लेन’ को अगाडि  ‘बा’ हरू।

आमाहरू

ADVERTISEMENT

ADVERTISEMENT

उहिले
हाम्रा देशमा थोरै आमाहरू थिए
कोहीलाई सती भनेर जलाइयो
कोहीलाई अरुणमा हामफाल्न बाध्य बनाइयो
बचेखुचेकालाई अहिले
बलात्कारको भुङ्ग्रोमा हालेर
लास बनाइँदै छ

अहिले धेरै आमाहरू छन् तर तिनलाई
कि त र्याम्पमा उतारिँदैछन् सुन्दरी बनाएर
कि त नचाइँदैछन्
कुनै सरकारको पदमा कठपुतली बनाएर
र बजारको भाउमा बेचिरहेछन् तिनका हस्ताक्षर
ठेकेदार बाहरूले!

ADVERTISEMENT