इटहरीमा कारले ठक्कर दिँदा एक पुरुषको मृत्यु

इटहरी / इटहरीमा कारले ठक्कर दिँदा एक पुरुषको मृत्यु भएको छ ।

बुधबार बेलुका ७ः३० बजेतिर इटहरी १२ रिलायन्स फ्याक्ट्री गेट अगाडि कोशी लोकमार्गमा विराटनगरबाट इटहरीतर्फ जाँदै गरेको प्र १-०१-००१ च ७६५५ नम्बरको कारले पूर्वबाट पश्चिमतर्फ बाटो क्रस गर्दै गरेको साइकलयात्री इटहरी १३ बस्ने ६५ वर्षीय रामप्रसाद घिमिरेलाई ठक्कर दिएको थियो ।

ठक्करबाट गम्भीर घाइते भएका उनको विराटनगरस्थित विराट नर्सिङ होममा उपचारको क्रममा राति ९ बजेतिर मृत्यु भएको प्रहरीले जनाएको छ । कार चालक सोही स्थानका ३७ वर्षीय पूर्ण बहादुर कार्की तत्काल फरार रहेकाले खोजी कार्य भइरहेको प्रहरीको भनाइ छ ।

कार तीव्र गतिका कारण दुर्घटना भएको प्रहरीको प्रारम्भिक अनुसन्धानबाट खुलेको छ । घटनाबारे थप अनुसन्धान भइरहेको प्रहरीले जनाएको छ ।