सिटौलालाई राष्ट्रियसभा सदस्यको उम्मेदवारमा सिफारिसको निर्णय

झापा । नेपाली कांग्रेस झापाले आगामी माघ ११ गते हुने राष्ट्रियसभा निर्वाचनका लागि पार्टीका नेता एवम् पूर्वमहामन्त्री कृष्णप्रसाद सिटौलालाई उम्मेदवार सिफारिस गर्ने सर्वसम्मत निर्णय गरेको छ ।

नेपाली कांग्रेस झापाका सभापति देउकुमार थेवेको सभापतित्वमा सम्पन्न जिल्ला कार्यसमिति, क्षेत्र, प्रदेशसभा क्षेत्र र गाउँ÷नगर सभापतिहरुको संयुक्त बैठकले राष्ट्रियसभा सदस्यका लागि सिटौलाको नाम सिफारिस गर्ने सर्वसम्मत निर्णय गरेको हो ।

बैठकमा सभापति थेवेले सिटौलाको नाम प्रस्ताव गरेका थिए भने राम कट्टेलले समर्थन मन्तव्य राखेका थिए । नेपालको शान्ति प्रक्रियामा सरकारी वार्ता टोलीको संयोजक भएर १० बर्षे माओवादी सशस्त्र विद्रोहलाई शान्ति वार्तामार्फत समाधानमा उल्लेखनीय योगदान पु¥याएका सिटौलाले संविधान मस्यौदा समितिको सभापति भएर नेपालको संविधान–२०७२ निर्माणमा महत्वपूर्ण योगदान गरेका थिए । पार्टीको नीति, विचार, कार्यक्रम रणनीति निर्माण गर्न अन्य पार्टी निकायहरुसँग समन्वयात्मक भूमिका निर्वाह गरी पार्टीलाई प्रभावकारी ढंगमा स्थापित गराउन समेत भूमिका खलेका सिटौलाले नेपालको लोकतान्त्रिक आन्दोलन २०४६ र २०६२÷०६३मा नेतृत्वदायी भूमिका निर्वाह गरेका थिए ।

यसैगरी बैठकले पार्टी केन्द्रीय समितिको मंसीर २९ गतेको बैठकले तय गरे अनुरुप पुस १६ गतेदेखि माघ १६ गतेसम्म सञ्चालन हुने ‘समुदायमा कांग्रेस’ अभियानलाई सफल बनाउन यसअघि वडा तहमा खटाइएका प्रतिनिधिहरुलाई सम्बन्धित वडामै अभियान सञ्चालनका लागि क्रियाशिल गराउने निर्णय गरेको पार्टी सचिव कृष्ण हुमागाँईले जानकारी दिए । यसैगरी नेपाल लोकतान्त्रिक आदिबासी÷जनजाति महासंघको आगामी पुस २१ गतेदेखि निरन्तर हुने वडा तहदेखिको चुनावी कार्यतालिका अनुसारको तहगत निर्वाचन सफल बनाउन वडामा खटिएका जिल्ला प्रतिनिधिहरुलाई यथास्थानमा सक्रियतापूर्वक खटिन आग्रह गर्दै बैठकले महासंघको चुनाव सम्पन्न गराउन सहयोग गर्न पार्टीका सबै तहगत संगठनलाई आग्रह पनि गरेको कार्यालय सचिव जयकुमार दाहालले जानकारी दिए ।

यसैबीच बैठकमा नेपाल लोकतान्त्रिक कानून व्यवसायी संघको प्रदेश उपाध्यक्षमा निर्वाचित नारायण पौडेल र नेपाल जेसीजको राष्ट्रिय उपाध्यक्षमा निर्वाचित घनश्याम चौधरीलाई खादा ओढाएर बधाई ज्ञापन गरिएको थियो ।