इटहरी : इटहरीमा ‘कंग्रेस रन २०८१’ सम्पन्न भएको छ । महामानव विश्वेश्वरप्रसाद कोइराला (वीपी)को जन्मजयन्तीको अवसर पारेर आज (शनिबार) नेपाली कांग्रेस सुनसरी क्षेत्र नं. २ (क)ले ‘कंग्रेस रन’ आयोजना गरेको हो । ५ किलोमिटर पूरा गर्ने धावकहरूलाई नगदसहित पुरस्कृत समेत गरियो ।
इटहरी ४ स्थित टेलिकम अगाडिबाट आँपगाछीस्थित पुरानो यातायात हुँदै पुनः टेलिकम नै पुगेर दौड समापन भएको थियो ।
दौड प्रतियोगितामा पुरुषतर्फ १४ मिनेट ५१ सेकेण्डमा ५ किमि पूरा गर्ने धनु मानन्धर प्रथम भए । यसैगरी १४ मिनेट ५२ सेकेण्डमा बिक्रम लिम्बू र १५ मिनेट १५ सेकेण्डमा ५ ओशन राईले किमि पूरा गर्दै क्रमशः द्धितीय र तृतीय भए ।
महिलातर्फ १९ मिनेट २५ सेकेण्डमा सुनकला राई, १९ मिनेट ४६ सेकेण्डमा इन्द्रकला लिम्बू र १९ मिनेट ५६ सेकेण्डमा एलिशा राईले ५ किमि दौड पूरा गर्दै क्रमशः प्रथम, द्धितीय र तृतीय भए । पुरुष र महिलातर्फ विजेताहरूले जनही नगद १० हजार, सात हजार र पाँच हजारसहित मेडल, प्रमाणपत्र प्राप्त गरे ।
कार्यक्रमका प्रमुख अतिथि कांग्रेस सुनसरीका सभापति केदार भण्डारीले वीपीलाई स्मरण गर्न दौड प्रतियोगिता आयोजना गरी समुदायसम्म कांग्रेस पुग्नु सुखद रहेको बताए । ‘युवाहरू कुलतमा लागिरेको घटना बढ्दै जाँदा कुलत छाडेर स्वास्थ्यमा सजग हुनुपर्छ भन्ने पनि यो कार्यक्रमले सन्देश दिएको छ,’ उनले थपे, ‘मानिसको सबैभन्दा ठूलो सम्पत्ति नै स्वास्थ्य हो ।’
वीपी जन्मिएको दिन नेपालकै लागि शौभाग्यको दिन रहेको उनले बताए । कोही गरिब, कोही पिछडिएका कारणले कांग्रेसले समान अवसर प्रदान गर्ने भण्डारीको भनाइ छ ।
आयोजक, कांग्रेस सुनसरी क्षेत्र नं. २ (क) का सभापति सुबेक्छु देवानका अनुसार गत वर्षदेखि सुरु भएको वीपी सप्ताहलाई यस वर्ष पनि निरन्तरता दिएको हो ।
गत बुधबार रामधुनी ५ मा सुरु भएको सप्ताहको समापन भने आगामी सोमबार इटहरीस्थित श्री कृष्ण प्रणामी मन्दिरमा गरिने देवानले बताए ।
कार्यक्रममा कांग्रेस कोशी प्रदेश सदस्य केशव भट्टराई, जिल्ला सचिव वीरेन्द्र साह, इटहरी २० का वडाध्यक्ष मणिराम श्रेष्ठ, महाधिवेशन प्रतिनिधि विकास केसी, नेविसंघ सुनसरी सभापति प्रमोद भट्टराईलगायतले बोलेका थिए ।
भविन खड्काले स्वागत राखेको दौड प्रतियोगितामा विभिन्न स्थानबाट आएका करिब पाँच सय धावकहरूको सहभागिता रहेको सचिव चिन्तामणि सापकोटाले बताए ।
Discussion about this post