धरानमा दुई करोड ठगेर सपना राई फरार, ‘आकर्षक ब्याज’को लोभमा यसरी फसे सर्वसाधारण

धरान । धरान उपमहानगरपालिका १७ स्थित रेल्वेमा कोठाभाडामा बस्दै आएकी एक महिलाले दुई करोड ठगेर फरार भएकी छन् । रेल्वेमा ८ वर्ष अघिदेखि कोठाभाडामा बस्दै आएकी धनमाया भनिने सपना राईले स्थानीय सर्वसाधारणलाई ‘आकर्षक ब्याजको लोभ’ देखाएर दुई करोडभन्दा बढी ठगेर फरार भएकी हुन् ।

कसैसँग पैसा त कसैसँग सुन नै लिएर उनले ठगी गरेको घटना बाहिरिएको छ । यस विषयमा प्रदेश खबरले स्थलगत रिपोर्टिङ गर्दा पीडित सर्वसाधारणहरूले आँफू ठगिएको बताएका छन् । कसैलाई आर्कषक ब्याज दिने लोभ त, कसैलाई घर किन्न खाँचो प¥यो भन्दै रकम उठाएकी सपना फरार भएको एक वर्ष बितेको छ ।

पीडित सर्वसाधारणले खोजी गरेको र आउने बाटो हेरेपनि सपना फरार बनेपछि अहिले बिचल्ली भएको बताइएको छ । यसरी ठगिने महिलाहरूले राईलाई एक लाख ५० हजार रुपैयाँदेखि ५० लाखसम्म बुझाएका छन् ।

५ तोला सुन साथै नगद समेत गरेर ११ लाख बुझाएकी स्थानीय सुमित्रा राईले सुन उकास्न नसकेर पसलमै सुन बेच्न बाध्य भएको बताइन् । ‘मैले ब्याजमै ऋण लिएर दिएकी थिएँ,’ उनले भनिन्, ‘विश्वासको भरमा पर्दा अहिले आफ्नै बिचल्ली भयो ।’

सपनाबाट ठगीमा परेकी सुमित्रा एक उदाहरणकी पात्र मात्र हुन् । उनीजस्तै दर्जन बढी महिलाहरू सपनाबाट पीडित भएका छन् । अर्की पीडित बिनुका बिष्टले सम्बन्ध राम्रो भएकै कारण विश्वासको भरमा पैसा दिएपनि अहिले फरार भएकाले निकै तनावमा रहेको सुनाइन् । सपनाले उनीकहाँ २३ लाख रुपैयाँ लिएकी थिइन् । ‘न सावाँ रकम हात लाग्यो, न ब्याज नै,’ बिष्टको गुनासो छ, ‘त्यसबेला साथीलाई भनेर विश्वास गरेकाले श्रीमानलाईसमेत थाहै नदिई पैसा सापटी दिएँ, अहिले पैसाकै कारण घरपरिवार नै बिग्रने अवस्था आइसक्यो ।’

अघिल्लो असोज १५ गते पैसा दिन्छु भनेर सापट लिएकी सपना सोही दिनबाट उनी बस्दै आएको ठाउँ छाडेर फरार भएको पीडित महिलाहरूको भनाइ छ । साढे १८ लाख रुपैयाँ नगद र ११ तोला सुनसमेत राईकै हातमा लगेर दिएकी सोही ठाउँकी रञ्जु भण्डारीले पनि विश्वासमा पर्दा आँफू घरबारबिहीन हुने अवस्थामा पुगेको सुनाइन् ।

यस्तै, स्थानीय पूर्णिमा बस्नेतले पनि राईलाई १६ लाख रुपैयाँ नगद र ५ तोला सुन दिएकी थिइन् । ‘घर किन्नका लागि भनेर पटकपटक पैसा मागेपछि विश्वासमा परेर पैसा र सुन दिएको थिएँ,’ उनी भन्छिन्, ‘त्यति बेला पैसा दिइहालेँ, अहिले घरमा तरकारी किनेर खानेसमेत पैसा छैन ।’

अर्की पीडित इन्दिरा बस्नेतले पैसा फसेर बिल्लीबाठ हुने अवस्था आएपछि आँफू मानसिक रूपमै समस्यामा परेको बताइन् । तीन दिनमै पैसा दिने शर्तमा पैसा लगेकी सपनाले पैसा फिर्ता गर्ने त परको कुरा, आँफू बसेको ठाउँ नै छाडेर फरार भएकाले अहिले सर्वसाधारणहरू आँफू ठगिएकोमा बेलाबेला झस्किरहन्छन् ।

स्थानीय पीडित भीमबहादुर चौहानले गाउँलेहरूलाई प्रलोभनमा पारेर ती महिलाले ठगी गरेकोबारे कसैलाई थाहै नभएको बताए । ‘एकले अर्काको बारेमा थाहै भएन । त्यही भएर सबैको पैसा फसेको रहेछ,’ उनले भने, ‘हेर्दा विश्वास गर्न लायक भएपनि व्यवहारमा त्यसो रहेनछ । गाउँले सबै ठगिदाँ मात्रै थाहा भयो ।’

सपनाबाटै यसरी ठगिनेमा स्थानीय तारा बिष्ट, अस्मिता गुरागाई, प्रेमदिकी शेर्पा, तारा चौहान, टीका चौहान, चन्द्रकला राई, शारदा श्रेष्ठ, कुमारी भण्डारी, अरुण भण्डारी, बद्री कार्की, मनमाया थापा लगायत छन् ।
‘म सँग पैसाको कारोबार भएको छ भनेर कसैलाई नसुनाउनु’ भनेर सपनाले गाउँलेसँग पैसा उठाउने गरेको पीडितहरू बताउँछन् ।

एक श्रीमान र २ छोराहरूसँग बस्दै आएकी सपना फरार भएको गत असोज १५ गते एक वर्ष पूरा भयो । तर, फरार रहेकी सपनाको अत्तोपत्तो नहुँदा पीडितहरू समस्यामा परेका छन् ।

पछिल्लो समय यसरी ठगीमा पर्नेको संख्या बढेको सुनसरी प्रहरीको तथ्यांक छ । कसैलाई विश्वास गरेर, ब्याजको लोभमा वा सापटीको नाममा पैसा सापटी दिएपनि फिर्ता नहुने गरेको जिल्ला प्रहरी कार्यालय सुनसरीको तथ्यांक रहेको छ ।

यता, यस विषयमा इलाका प्रहरी कार्यालय धरानका प्रमुख, प्रहरी नायब उपरीक्षक (डीएसपी) नवराज मल्लले ठगीमा पर्नेहरूबाट उजुरी आएमा अनुसन्धानको प्रक्रिया अगाडि बढाउने प्रतिक्रिया दिए ।