इटहरी : इटहरी खानेपानी उपभोक्ता संस्थामा विवाद उत्पन्न भएको छ । बिहीबार खानेपानी संस्थाको २० औँ परिषद् बैठक (साधारण सभा)मा कुर्सी हानाहानको स्थिति आएको हो ।
संस्थाका महासचिव शालिकग्राम ढकालले बैठक सञ्चालन गरिरहँदा परिषद् सदस्यहरूबीच विवाद सुरु भएको थियो ।
बैठकमा उपस्थित नेकपा एमाले पक्षीय परिषद् सदस्य र नेपाली कांग्रेस पक्षीय परिषद् सदस्यहरूबीच विवाद बढ्दै गएपछि कुर्सी हानाहानको स्थिति आएको हो ।
संस्थाका महासचिव ढकालले बैठकमा प्रस्ताव पेश गरेका थिए । ९ वटा प्रस्ताव पेश गरेपछि फ्लोरबाट कांग्रेस पक्षका परिषद् सदस्यहरूले सभा सञ्चालन कार्यविधि अनुसार नभएको भन्दै विरोध गरेका थिए । संस्थाको विधान समयानुकूल नभएको भन्दै विधान संशोधन गर्नुपर्ने प्रस्ताव राखिएको थियो ।
संस्थाको अध्यक्षसहित कार्यसमिति प्रत्यक्ष निर्वाचनबाट चयन गर्नुपर्ने, वडा समितिलाई अधिकार प्रत्यायोजन गर्नुपर्ने लगायतका मागसहितको विधान संशोधनको प्रस्ताव पेश गरिएपनि कार्यसमितिले विधान संशोधनको विषयलाई प्रस्तावमा राख्न नमानेपछि उक्त परिस्थिति उत्पन्न भएको हो ।
महासचिव र परिषद् सदस्यहरूबीच सवालजवाफ बढ्ने क्रम रहेपछि एमाले पक्षका परिषद् सदस्यले उठेर विरोध जनाएका थिए । त्यसपछि एमाले र कांग्रेस पक्षका सदस्यहरूबीच विवाद बढेको प्रत्यक्षदर्शीले जनाएका छन् ।
संस्थाको विधान संसोधन प्रस्ताव राख्न नमानेपछि विवाद भएको नेपाली कांग्रेस पक्षका परिषद सदस्य दीपक दाहालले जानकारी दिए ।
उनले भने,‘ साधारण सभा नै फरक ढंगले चल्दा कार्यविधि अनुसार सञ्चालन गर्न माग गयौँ । त्यो पनि भएन । पछि विधान समय अनुकुल नभएकाले प्रत्यक्ष निर्वाचित अध्यक्षसहितको कार्यसमिति चयन गर्नुपर्ने प्रस्ताव पेश गरिएको हो ।’
यता, संस्थाका उपाध्यक्ष प्रेम बस्नेतले साधारणसभामा समान्य विवाद मात्रै भएको प्रतिक्रिया दिए । संस्थामा एक ८३ परिषद् सदस्य रहेका छन् । जसमा नेकपा एमालेको स्पष्ट बहुमत छ ।
Discussion about this post