बरमझियामा सहिदहरूको सम्झनामा दीप प्रज्वलन, शान्तिपूर्ण आन्दोलन जारी राख्ने युवाको अठोट

सप्तरी । सप्तरीको कञ्चनरुप नगरपालिका–२ स्थित बरमझिया शनिबार राति राष्ट्रिय शोकको प्रतीक बनेको थियो। काठमाडौंमा चलेको जेन–जेड आन्दोलनका क्रममा ज्यान गुमाएका सहिदहरूको सम्झनामा स्थानीय युवाहरूले श्रद्धाञ्जली कार्यक्रम आयोजना गरेका हुन्।

अनिल कुमार साह, विकास कुमार साह, शुभम रौनियार, मुकेश गुप्ता लगायत स्थानीय युवा अगुवाहरूको संयोजनमा आयोजित कार्यक्रममा गाउँ–समुदायको उल्लेख्य सहभागिता रह्यो। दीप प्रज्वलन, मौन धारण र सामूहिक प्रार्थनाले वातावरणलाई भावनात्मक मात्र होइन, उज्यालो र दृढ संकल्पको प्रतीक बनाएको थियो।

सभा सम्बोधन गर्ने क्रममा युवा अगुवाहरूले सहिदको बलिदान व्यर्थ नजाने स्पष्ट अठोट व्यक्त गरे। उनीहरूले भने, “यो आन्दोलन कुनै स्वार्थमा सीमित छैन, यो भ्रष्टाचार, शोषण र अन्यायको विरुद्धमा उठेको ऐतिहासिक हुंकार हो।” सहिदहरूले आफ्नो रगत बगाएर नयाँ पुस्तालाई स्वतन्त्रता, समानता र न्यायको बाटो देखाइदिएको उल्लेख गर्दै उनीहरूले आन्दोलनलाई निरन्तरता दिने प्रतिबद्धता जनाए।

युवाहरूले अब मौन नबस्ने घोषणा गर्दै गाउँ, नगर वा देशको जुनसुकै ठाउँमा भए पनि गैरकानुनी गतिविधि वा भ्रष्टाचार देखिए निर्भीक भएर आवाज उठाउने बताए। तर, उनीहरूले आन्दोलन शान्तिपूर्ण ढंगले मात्र गर्ने अठोट व्यक्त गरे।

कार्यक्रममा सहभागी युवाहरूले सहिदहरूको सम्झनामा शोकसँगै दृढ सङ्कल्पलाई जोड दिए। साथै, आन्दोलनमा घाइते भएकाहरूको शीघ्र स्वास्थ्यलाभको पनि कामना गरे।

बरमझियाबाट उठेको यो स्वर अहिले सम्पूर्ण देशमा प्रतिध्वनित भइरहेको छ। जनताले विश्वास व्यक्त गरेका छन् कि रगतले लेखिएको यो क्रान्ति अब कहिल्यै रोकिने छैन।