देशमा आतङ्क छ, शान्तिको पक्षमा उभिएकोमा सरकार रिसाएको छ : ओली

काठमाडौँ । नेकपा एमालेका अध्यक्ष केपी शर्मा ओलीले ‘नेपो–बेबी’ भन्दै बालबालिकामाथि आक्रमण गरिएको बताएका छन् ।

शनिवार भेटघाट तथा चियापान कार्यक्रममा बोल्दै उनले दुनियाँमा फैलिएको डेंगु र कोभिड जस्तै खतरनाक ‘नेपो बेबी’ अभियान चलेको बताए ।

उनले भने, ‘दुनियाँमा फैलिएको डेंगु भन्दा खतरनाक र कोभिड जस्तै खतरनाक नेपो बेबी । अब त्यो बच्चाको के दोष ? यो समाज हो की मान्छेहरूको भीड मात्रै हो ।  यो सभ्य समाज हो की, असभ्यहरूको  जमातको भीड हो ? अहिले बालबालिकाहरूलाई त्रसित बनाइएको छ । नेपो बेबी भनेर बालबालिकामाथि आक्रमण गरिएको छ । के सिक्दै छ हाम्रो समाज अनि हामी त्यही हल्लाको पछि लाग्ने हो ?’

साथै उनले हाल देशमा शान्ति र स्थायित्वको आवश्यकता रहेको भन्दै सरकारले त्यसको विरोध गरेको आरोप लगाएका छन् । ओलीले देशमा आतङ्क फैलिएको र सरकारले त्यसलाई नियन्त्रण गर्नुको सट्टा शान्तिको पक्षमा बोलेकामा आफूप्रति रिस व्यक्त गरिरहेको दाबी गरे ।

उनले भने, ‘हामीले बेठिक कुराहरू, बेठिक हावाहरू, ‘नेपो बेबी’ जस्ता नचाहिने कुरा सिक्नु हुँदैन । यो कुनै सभ्यता पनि होइन, केही पनि होइन । देशमा अहिले आतङ्क छ । यस्ता गतिविधिहरू अब पनि नरोक्ने ?’

ओलीले पछिल्ला दिनहरूमा सार्वजनिक तथा निजी सम्पत्तिमा भएको तोडफोड, आगजनी, लुटपाटजस्ता घटनाप्रति आक्रोश व्यक्त गरे । उनले प्रश्न गरे, ‘सामान लुट्दै–चोर्दै भाग्दै गर्न हुँदैन भनेको सुनेर सरकार रिसायो होला ? आगो लगाउनु हुँदैन भनेकोमा रिसायो होला ? शान्तिको कुरा गरेको सुनेर रिसायो होला ?’

सरकारप्रति कटाक्ष गर्दै ओलीले थपे, ‘सरकारलाई रिस उठे पनि, जसलाई उठे पनि म भन्न चाहन्छु यो देशमा नेकपा एमाले पनि छ । हामी लडेर भए पनि देशलाई शान्तिपूर्ण देशको रूपमा परिणत गरेरै छाड्छौँ ।’

उनले सामाजिक सन्तुलन भङ्ग गर्ने र हिंसात्मक गतिविधिबाट लाभ उठाउने प्रयासहरूलाई अस्वीकार्य ठहर गरे । ‘अर्काको सम्पत्ति लुटेर आफ्नो जीविकोपार्जन चलाउने, अधुरो खुसीका लागि हिंसा मच्चाउने, अर्काको घरमा आगो लगाउने—कस्तो रिस हो यो? कस्तो आक्रोश हो?’ओलीले प्रश्न गरे ।