डब्लुएचओले भन्यो: पपुवा न्यू गिनीमा पोलियो प्रकोप ‘आउट ब्रेक’

काठमाडौं : विश्व स्वास्थ्य संगठन (डब्लुएचओ) ले पपुवा न्यू गिनीमा पोलियोको प्रकोप (आउटब्रेक) घोषणा गरेको छ र यसका विरुद्ध तत्काल खोप अभियान सुरु गर्न आग्रह गरेको छ।

देशको उत्तरपूर्वी तटीय सहर लेसमामा नियमित स्वास्थ्य परीक्षणको क्रममा दुईजना स्वस्थ बालबालिकामा अत्यधिक संक्रामक पोलियो भाइरस भेटिएको हो।

डब्लुएचओका अनुसार देशको आधा जनसंख्यालाई मात्रै पोलियोविरुद्धको खोप दिइएको छ, जसले थप चिन्ता बढाएको छ।

पोलियो रोग, जुन प्रायः पाँच वर्षमुनिका बालबालिकामा देखिन्छ, खोक्दा, हाच्छ्युँ गर्दा वा फोहोरको सम्पर्कबाट सर्छ। यसको उपचार छैन, र यसले बिरलै भए पनि गम्भीर पक्षाघातसम्म ल्याउन सक्छ—विशेषतः सास फेर्न प्रयोग हुने मांसपेशीहरूलाई असर गर्दा।

पपुवा न्यू गिनी सन् २००० मा पोलियोमुक्त घोषित भएको भए पनि सन् २०१८ मा नयाँ संक्रमित भेटिएपछि पुनः संक्रमण फैलिन थालेको हो।

अहिले फेला परेको पोलियो भाइरस इन्डोनेसियामा हालै देखा परेकासँग आनुवंशिक रूपमा सम्बन्धित देखिएको छ। यी दुई देशहरूबीच सिमाना रहेकाले संक्रमण फैलिने जोखिम अझ बढी भएको डब्लुएचओले चेतावनी दिएको छ।

पपुवा न्यू गिनीका स्वास्थ्य मन्त्री इलियास कपाभोरले २०२५ को अन्त्यसम्म सबै नागरिकलाई पोलियोविरुद्धको खोप दिन प्रतिबद्धता जनाएका छन्। डब्लुएचओका प्रतिनिधि डा। सेभिल हुसेनोभले १०० प्रतिशत खोप कवरेजको लक्ष्य राख्दै रोगको अन्तर्राष्ट्रिय फैलावट रोक्न तत्काल कदम चाल्नुपर्ने बताएका छन्। “पोलियोले सिमाना चिन्दैन,” उनको भनाइ छ।

यो अवस्थाले पोलियो उन्मूलनको विश्वव्यापी प्रयासमा चुनौती थपेको छ। अबको प्राथमिकता पूर्ण खोप कवरेज र संक्रमण नियन्त्रण नै रहेको डब्लुएचओको निष्कर्ष छ।