मक्काबाट मदीना जाँदै गरेकाे बस दुर्घटना हुँदा ४२ भारतीयको मृत्यु

काठमाडौँ : साउदी अरबस्थित मक्काबाट मदानीतर्फ जाँदै गरेको बस दुर्घटनामा पर्दा ४२ भारतीय तिर्थयात्रीको मृत्यु भएको छ।

भारतीय समयअनुसार सोमबार बिहान १:३० बजे बस डिजेट ट्याङ्करसँग ठोक्किएर दुर्घटना भइ आगलागी हुँदा ११ बालबालिका र २० महिलासहित ४२ जनाको मृत्यु भएको भारतीय सञ्चारमाध्यामले जनाएका छन्।

दुर्घटनामा मारिनेहरूमध्ये अधिकांश हैदराबादका रहेका छन्। मदीनाबाट करिब एकसय ६० किलोमिटर टाढा मुहरास नजिक बस र ट्याङ्कर ठोक्किएका थिए। त्यसलगत्तै बसमा आगलागी भएको र धेरै यात्रु सुतिरहेकाले भाग्नसमेत नसकेको समाचारमा जाइएको छ।

तेलंगाना सरकारका मुख्यमन्त्री रेवन्त रेड्डीले दिल्लीस्थित अधिकारीहरूलाई दूतावाससँग समन्वय गर्दै मृतकहरूको पहिचान र अन्य आवश्यक प्रक्रिया पूरा गर्न निर्देशन दिएका छन्।

मदीना नजिक भारतीय ‘उमरा’ यात्रु सहभागी भएको दु:खद दुर्घटनापछि जेद्दास्थित भारतीय महावाणिज्य दूतावासले परिवारलाई सम्पर्कका लागि हेल्पलाइन नम्बर जारी गरेको छ। त्यस्तै तेलंगाना सरकारले पनि सचिवालयमा कन्ट्रोल रुममार्फत आफन्त र परिवारलाई सम्पर्कका लागि सहजिकरण गरेको छ।

‘उमरा’ वर्षको कुनै पनि समयमा गर्न सकिन्छ, यसको लागि कुनै निश्चित मिति हुँदैन। यो हजजस्तै अनिवार्य त होइन, तर मक्का-मदीना जाने एउटा छोटो प्रकारको धार्मिक यात्रा हो, जुन कुनै पनि मुसलमानले कहिले पनि, जति पटक चाह्यो त्यति पटक गर्न सक्ने तिर्थाटन हो।

उमराका लागि गएका भारतीयहरुनै दुर्घटनामा परेका हुन्।