‘पार्टीमा म ठिक, अरु बेठिक भनेर हिँड्दा राम्रो परिणाम आउँदैन’

सिराहा । नेपाली कांग्रेसका प्रवक्ता एवं अर्थमन्त्री डा. प्रकाशशरण महतले पार्टीमा सबै मिल्दा मात्र सुखद परिणाम आउने बताएका छन् । आफू भए सबै राम्रो हुने र अरु भए नहुने भन्ने खालको धारणाबाट परिणाम नआउने उल्लेख गर्दे उनले सबै मिलेर अघि बढ्नुपर्नेमा जोड दिए । पार्टीको आन्तरिक विशेष अभियान समापन समारोहलाई सम्बोधन गर्दै नेता डा. महतले यस्तो बताएका हुन् । ‘कसैले पनि एक्लै परिणाम ल्याउन सक्दैन । बीपी कोइरालाले पार्टीको नेतृत्व गर्दा त गणेशमान, कृष्णप्रसाद र सुवर्णशमशेरको आवश्यकता परेको थियो । अहिले त्यस्तो कोही पनि छैन । त्यसकारण कसैले वा कुनै पुस्ताकाले म भए सबै हुन्थ्यो, अरु भएर यस्तो भन्नु बेकारको कुरा हो’ उनले भने । संस्थाको निर्णय लिएर जनताको बीचमा जानुपर्ने उल्लेख गर्दे महतले संस्थागत कुरा सामाजिक सञ्जालमा उल्टापाल्टा गरियो भने जनता दुविधामा पर्ने बताए । ‘संस्थागत निर्णय जे हुन्छ, त्यो लिएर एउटै भावनाका साथ जनताका बीचमा जानुपर्छ’ उनले भने । नेपाली कांग्रेसप्रति आस्था र समर्थनका बाबजुद मतदानका बेला रुपान्तरण नहुनुमा पार्टीभित्रको अनेकता जिम्मेवार रहेको उनको ठहर छ । ‘एकले अर्कालाई नसहने प्रवृत्ति जिम्मेवार छ । बरु अर्को पार्टीको जोसुकै होस, यो चाहिँ हुनुहुन्न, यो चाहिँ हारिजाओस् भन्ने मानसिकता हाबी छ’ डा. महतले भने । ‘नागरिकताको समस्या मधेशमा बढी छ, त्यसलाई अरु कसैले पार लगाउन सकेको थिएन, प्रतिपक्षी दल एमालेले नागरिकताको विषय अलमल्याएको सबैलाई थाहा छ, नेता डा. महतले भने, ‘मधेशवादी दलहरुले पनि त्यो विषयलाई निक्र्योलमा पुर्याउन सक्ने अवस्था थिएन । नेपाली कांग्रेसले मात्र निक्र्योलमा पुर्याउन सक्छ, कांग्रेसकै कारण अहिले कानुन बनेको छ ।’ भर्खर जन्मिएको राजनीतिक दलजस्तो कर्तव्यबाट भाग्ने पार्टी नेपाली कांग्रेस नभएको उनको भनाइ छ । ‘कांग्रेस परिचित पार्टी हो, अप्ठ्यारोमा भाग्दैन । कांग्रेस सदाबहार पार्टी हो, कहिले तल भयो भनेर आत्तिदैन, माथि पुग्यो भनेर मात्तिदैन । कांग्रेससँग इतिहास छ, सिद्धान्त छ, त्यसकारण कांग्रेस हुनुमा गर्व गर्नुपर्छ’ डा. महतले भने ।