उपमहानगरले नदेखेको धरान : आमबोटे-जुवाने क्षेत्र जाने पुल ७ वर्षदेखि अलपत्र, स्थानीय भन्छन् - ‘मेयरले उपेक्षा गरे’

धरान : धरान उपमहानगरपालिका वडा नम्बर ४ स्थित आमबोटे र जुवानेलाई सेउती खोलाले छुट्याएको छ । सेउती वारी र पारी आउजाउलाई सहज बनाउन भनेर २०७४ सालमा पुल बन्न सुरु भयो । पिल्लरहरू ठडिए, फलामे संरचनाहरू निर्माणको क्रम सुरू भयो । तर, मेयर तारा सुब्बाको असामयिक निधनसंगै पुल बन्ने काममा पनि पूर्णविराम लाग्यो । विजयपुर छिचोलेर धरान सहरसँग करिब चार किलोमिटर दूरीमा रहेको उक्त आमबोटे जुवाने क्षेत्र धरान उपमहानगरपालिका होइन, उपेक्षामा परेको कुनै विकट र दुरदराजको गाउँ जस्तै छ । सम्पन्न धरान सहरभित्रै रहेको यो पुल बन्न सुरू भएको ७ वर्ष बितिसक्दा पनि निर्माण सम्पन्न हुन सकेन । पुल अभावमा सेउती पारीका ४ नम्बर वडाभित्रै रहेका छबोटे, दानाबारी, कालिमाटी, नैने, खाकर डाँडा, किरात टोल, नहरे, जुवाने, हर्दिया, तेलनपुर, एक्लेटार र ढाडे लगायतका दर्जनौँ घरपरिवार समस्यामा छन् । त्यहाँ उत्पादन हुने तरकारी, फलफूल, सागसब्जी, दूध लगायतका अन्नबालीहरू सहजै धरान बजारसम्म ल्याउन समस्या छ । यसैबीच मंगलबार नेकपा (एमाले)का कोशी प्रदेश सदस्य, प्रचार तथा प्रकाशन विभाग उपप्रमुख भीमज्वाला राईको संयोजनमा कोशी प्रदेश सभा सदस्य रमेशकुमार बस्नेत, धरान ४ नम्बर वडा सदस्य राज चाम्लिङ, नेकपा (एमाले) धरान नगर सचिव राजेन्द्र राई तथा सञ्चारकर्मीहरूको टोली जुवानेस्थित सेउती खोलामा रहेको पुलको स्थलगत अध्ययनका लागि पुगेका थिए । प्रदेश सांसद बस्नेत, वडा प्रतिनिधि, पार्टी नेताहरू र सञ्चारकर्मीहरूसँग स्थानीयले आफ्ना पीडा पोखेका थिए । स्थानीय राजेन्द्र राई भन्छन्, ‘हामीलाई धरान उपमहानगरपालिकाले चिन्दैन । हाम्रो पीडा देख्दैन, हामीलाई सुन्दैन । तारा सुब्बाले सुरूमा १० लाख बजेट विनियोजन गरिदिनुभयो । हामी स्थानीयले जनश्रमदान पनि ग¥यौँ । पुनः २० लाख बजेट छुटिएको थियो । तर, सबै बजेट कार्यान्वयन गर्न सकिएन ।’ तत्कालीन मेयर सुब्बाको देहान्तसँगै अरू कसैले पनि यो वडाको समस्यालाई बुझ्न नसकेको स्थानीयको भनाइ छ । हिउँदका समय केही महिनाबाहेक वर्षा लगायतका याममा त्यस भेगका विद्यार्थीहरू विद्यालय जान, टोलबासीहरू बजार जान करिब ३ घण्टाको बाटो घुमेर जानुपर्ने अवस्था रहेको नहरेका स्थानीय अविरसिं राईले बताउँछन् । ‘अहिले सुख्खा छ, तर केही पानी पर्नेबित्तिकै बाढी आउँछ । पारी जान धेरै घुम्नुपर्छ, कति घुम्नु भनेर खोलामा पस्यो लडाइहाल्छ । ज्यान नै बाजी लाउनुपर्ने अवस्था छ,’ स्थानीय हिमालसरी राईले भनिन् । धरानभित्रै भएर पनि वर्षौदेखि यहाँका किसानहरूको समस्या समाधान नभएको सरस्वती राई बताउँछिन् । वडा नम्बर ४ का वडा सदस्य राजन चाम्लिङ स्वयम् उपमहानगरले यस वडालाई बेवास्ता गरेको गुनासो गर्छन् । उनले भने, ‘सानातिना योजनाबाहेक अन्य योजनामा मेयर हर्क साम्पाङले अस्वीकार गर्छन् ।’ सुरूमा बनेको संरचनालाई गत असार, भदौ र असोजको भारी वर्षा र बाढीले केही क्षतिसमेत पुगेको छ । त्यसलाई मोटरेवल पुल निर्माण गर्ने हो भने करिब २५ देखि ३० लाख बजेटको आवश्यकता पर्छ । कोशी प्रदेश सदस्य रमेशकुमार बस्नेतको पहलमा कोशी प्रदेश सरकार सहरी विकास मन्त्रालयले चालु आर्थिक वर्षको बजेटमा १५ लाख बजेट विनियोजन गरिदिएको छ । तर, पुन निर्माण सम्पन्न गर्न अपुग छ । यसबारे बस्नेत भन्छन्, ‘प्रदेश सरकारले १५ लाख रकम छुट्याएको छ । अपुग रकम वडा नम्बर ४ र स्थानीय साझेदारीमा पुल निर्माण सम्पन्न गर्नेगरी काम गर्नु पर्छ । यसको पहलकदमी वडा नम्बर ४ ले गर्नुपर्छ ।’ साथै, मंगलबार नै बसन्तटारका भगत राईको पहिरोले क्षतिग्रस्त घरघडेरीकोसमेत निरीक्षण गरिएको थियो ।