इटहरीमा बन्दैछ आधुनिक बसपार्क, कहिलेसम्म सकिन्छ निर्माण ? के हुन्छ सुविधा ?

इटहरी : इटहरी उपमहानगरपालिका–९ मा हाल बसपार्क निर्माणाधीन अवस्थामा छ । निर्माण भइरहेको बसपार्क अन्तिम चरणमा पुगेको उपमहानगरले जनाएको छ । करिब एक बिघा क्षेत्रफलमा बनिरहेको बसपार्कको हालसम्म ८० प्रतिशत भौतिक प्रगति भएको उपमहानगरको दाबी छ । इञ्जिनियर जीवन घिमिरेले बसपार्कको करिब ८० प्रतिशत भौतिक प्रगति सम्पन्न भइसकेको जानकारी दिए । उनका अनुसार नगर विकास कोषसँग ऋण लिएर व्यवस्थित बसपार्क निर्माणाधीन भइरहेको हो । बसपार्कमा नगर विकास कोष काठमाडौंले ७० प्रतिशत र इटहरी उपमहानगरपालिकाको ३० प्रतिशत लगानी रहनेछ । श्री अर्थ–हाम्रो–श्रीमान हेटौंडा–६, मकवानपुरले नौ करोड ४८ लाख ८३ हजार ५ सय ५६ रुपैयाँमा ठेक्का पारेर उक्त बसपार्क निर्माण गरिरहेको घिमिरेले बताए । झन्डै दुई दशकअघि निर्माण भएको बसपार्क अव्यस्थित भएकाले नमुना बसपार्क निर्माण भइरहेको उनको भनाइ छ । बसपार्क निर्माण भइसकेपछि कम्तिमा ६० वटा बस अट्ने क्षमताको हुनेछ । ‘बसपार्क र बसपार्कको भवनलाई सबैभन्दा धेरै फाईदा लिन सक्नेगरी कार्यविधि बनाएर उपयोग गर्ने योजना रहेको छ,’ इञ्जिनियर घिमिरेले भने । बसपार्कको निर्माणको धेरैजसो काम सम्पन्न भइसकेको र अहिले फिनिसिङको काम धमाधम भइरहेको उनले जनाए । घिमिरेका अनुसार बसपार्कमा बन्दै गरेको भवनको पहिलो तल्लामा टिकट काउन्टर, एटिएम बुथ, सिसीटिभी र सुरक्षा कक्ष साथै सार्वजनिक शौचालय रहनेछन् । भवनको दोस्रो तलामा यात्रुहरूको सहजता र उपमहानगरको आम्दानीका लागि सटर पसल राखिनेछ । यसैगरी भवनको सबैभन्दा माथिल्लो तलामा केही रेस्टुरेन्ट, कफी सप र प्रतीक्षालय तथा हलसमेत रहनेगरी निर्माण भइरहेको छ । ‘८२ असारभित्र निर्माण सम्पन्न गरेर हस्तान्तरण गर्नुपर्ने समयावधि भए पनि तोकिएको समय भन्दा अघि नै निर्माण सम्पन्न हुन्छ,’ घिमिरेले भने । सुविधा सम्पन्न बसपार्क निर्माण हुने भएपछि यातायात व्यावसायीहरू खुसी भएका छन् । बसपार्क वरपर निर्माण भएका भवनहरूमा टिकट काउन्टर सञ्चालन गर्दा भाडा महङ्गो तिर्नुपरेको गुनासो काउन्टर सञ्चालक कुमार खड्का बताउँछन् । उनले भने, ‘हामीले यो टिकट काउन्टरको भाडा महङ्गो तिर्दै आएका छौँ । तर उपमहानगरले बनाएको नयाँ भवनमा सहुलियत दरमा टिकट काउन्टर भाडामा पाउछौँ भन्ने आशा छ, हेरौँ !’ यस्तै व्यवस्थित बसपार्क बन्ने भएपछि यात्रुहरूसमेत खुसी भएका छन् । यात्रु भुपेश खत्रीका अनुसार अहिले टिकट काट्न बसपार्क वरपर रहेका टिकट काउन्टरहरूमा चाहर्नुपर्ने बाध्यता छ । तर, एउटै भवनमा काउन्टर भएपछि सहज हुने उनको विश्वास छ । बसपार्कमा प्रतीक्षालयसमेत हुने भएपछि यात्रुहरूले सवारी पर्खिदा घाम पानीबाट जोगिन होटलतिर छिर्नुपर्ने बाध्यता हट्ने उनले बताए ।