वराहक्षेत्रमा छैटौँ राष्ट्रपति रनिङ शिल्ड प्रतियोगिता सुरु

वराहक्षेत्र : वराहक्षेत्र नगरपालिकाको आयोजनामा शुक्रबारदेखि छैटौँ वराहक्षेत्र नगरपालिका माध्यमिक विद्यालयस्तरीय राष्ट्रपति रनिङ शिल्ड प्रतियोगिता सुरु भएको छ। प्रतियोगिताको उद्घाटन नगर प्रमुख रमेश कार्कीले गरे। उद्घाटन समारोहमा नगर प्रमुख कार्कीले विद्यालय तहदेखि नै खेलाडी उत्पादन गर्न राष्ट्रपति रनिङ शिल्ड प्रतियोगिताको महत्त्वपूर्ण भूमिका रहेको बताए। उनले पालिका स्तरीय प्रतियोगिताबाट छनोट भएका खेलाडीहरूले जिल्ला, प्रदेश हुँदै केन्द्रीयस्तरका प्रतियोगिताहरूमा सहभागी हुन पाउने अवसर प्राप्त गर्ने जानकारी दिए। साथै, यस प्रतियोगिताले विद्यार्थी र विद्यालयहरूबीच प्रतिस्पर्धात्मक भावना विकास गर्दै आपसी सम्बन्धलाई अझ प्रगाढ बनाउने विश्वास व्यक्त गरे। तीन दिनसम्म चल्ने प्रतियोगितामा नगर क्षेत्रभित्र रहेका सामुदायिक, संस्थागत, र धार्मिक विद्यालयहरूको सहभागिता रहेको छ। प्रतियोगितामा भलिबल, कबड्डी, एथलेटिक्स, र मार्सल आर्टजस्ता खेलका विभिन्न विधामा विद्यार्थी खेलाडीहरूले प्रतिस्पर्धा गर्नेछन्। वराहक्षेत्र नगरपालिका शिक्षा विकास शाखाका प्रमुख उत्तम राज भारतीले खेलकुदका माध्यमबाट विद्यार्थीहरूको शारीरिक र मानसिक विकासमा योगदान पुर्‍याउने उद्देश्यले प्रतियोगिता आयोजना गरिएको जानकारी दिए। बसन्तऋतु माध्यमिक विद्यालयको खेलमैदानमा आयोजित उद्घाटन समारोह नगर खेलकुद विकास समितिका अध्यक्ष कपिल आचार्यको सभाध्यक्षतामा सम्पन्न भयो। कार्यक्रममा प्रमुख अतिथिको रूपमा नगर प्रमुख रमेश कार्की, विशिष्ट अतिथिको रूपमा उपप्रमुख नन्दकुमारी सुनुवार, प्रमुख प्रशासकीय अधिकृत गणेश बहादुर कटुवाललगायत उपस्थित थिए। विद्यार्थीहरूले मार्च पास, सांस्कृतिक नृत्य, र कराते कात्ताजस्ता प्रस्तुति दिएर समारोहलाई आकर्षक बनाएका थिए। कार्यक्रममा वडा अध्यक्षहरू, कार्यपालिका सदस्यहरू, विद्यालयका प्रधानाध्यापक, खेल शिक्षक र प्रशिक्षकहरूको उपस्थिति रहेको थियो। प्रतियोगिताले विद्यालयस्तरीय खेलाडीहरूलाई प्रतिस्पर्धात्मक वातावरण प्रदान गर्दै उनीहरूको क्षमता पहिचान र विकास गर्न मद्दत पुर्‍याउने विश्वास व्यक्त गरिएको छ। वराहक्षेत्र नगरपालिकाले खेलकुदलाई प्राथमिकतामा राख्दै आगामी दिनमा पनि यस्ता प्रतियोगिताहरूलाई निरन्तरता दिने योजना बनाएको छ।