कांग्रेस सभापति देउवा भोलि भारत जाँदै

काठमाण्डौँ - नेपाली कांग्रेसका सभापति शेरबहादुर देउवा बिहीबार भारत जाने भएका छन् । भारत, उत्तर प्रदेशको प्रयागराजमा आयोजना हुने ‘कुम्भ ग्लोबल समिट अन डेभलपमेन्ट एण्ड सस्टेनेबिलिटी’मा सहभागी हुन सभापति देउवा त्यसतर्फ जान लागेका हुन् । कार्यक्रममा उत्तर प्रदेशका मुख्यमन्त्री योगी आदित्यनाथसहित विभिन्न देशका राजनीतिज्ञहरू पनि कार्यक्रममा उपस्थित हुनेछन् । देउवाले महाकुम्भमा स्नान पनि गर्नेछन् । त्यसपछि उनी त्यहाँबाटै नयाँ दिल्लीतर्फ जाने कार्यक्रम छ । यसबीच सभापति देउवा पत्नी तथा परराष्ट्रमन्त्री डा. आरजु राणाले पनि भारतमा चलिरहेको कुम्भ मेलामा सहभागी हुन देउवा त्यसतर्फ जाने लागेको जनाइकी छन् । ओमनको मस्कटमा रहेकी परराष्ट्रमन्त्री राणालाई भारतीय मिडियाले ‘कुम्भ मेला भ्रमण गर्ने योजना छ ?’ भनी सोधेको प्रश्नमा उनले यसबारे जानकारी दिएकी हुन् । ‘मेरो परिवारका सबै जना गएका छन्, मेरो श्रीमान् चाँडै जाँदै हुनुहुन्छ,’ परराष्ट्रमन्त्री राणाले भनिन् । आफ्नो कार्यव्यस्तताले गर्दा कुम्भ मेलामा सहभागी हुन नसकेको पनि उनले बताएकी छन् । परराष्ट्रमन्त्री राणा हिन्द महासागर सम्मेलनमा सहभागी हुन गत शुक्रबार ओमानको मस्कटमा छिन् ।