बिर्तामोड/ नेपाल पत्रकार महासङ्घ झापा महिला विभागको आयोजनामा शनिवार बिर्तामोडमा लैङ्गिक हिंसा न्यूनीकरणमा सञ्चार क्षेत्रको भूमिका विषयक अन्तरक्रिया सम्पन्न भएको छ ।
अन्तरक्रियाका सहभागीले लैङ्गिक हिंसा न्यूनीकरणमा सञ्चार क्षेत्र अझ जिम्मेवार बन्नुपर्नेमा जोड दिए । लैङ्गिक हिंसा न्यूनीकरणका लागि सञ्चार क्षेत्रको भूमिका महत्त्वपूर्ण हुने भन्दै उनीहरूले यसका लागि सबै सरोकारवालाहरूबिच सहकार्य समेत जरुरी रहेको औँल्याए ।
हिंसापीडितलाई न्याय दिन र पीडकलाई कानुनी कठघरामा ल्याउन सक्नुपर्नेमा उनीहरूको जोड थियो ।
अन्तरक्रियाको उद्घाटन प्रमुख अतिथि झापाका प्रमुख जिल्ला अधिकारी शिवराम पोखरेलले गरेका थिए । प्रतिअ पोखरेलले हिंसाको मुख्य कारण विभेद भएको बताउँदै मानिसको सोच र व्यवहारमा परिवर्तन ल्याउन जरुरी भएको बताए । उनले सरोकारवालाहरू एकजुट भई समाजमा सचेतना अभियान अघि बढाउनुपर्ने बताए ।
झापाको लैङ्गिक हिंसाको अवस्थाको विश्लेषणात्मक तथ्याङ्क जिल्ला प्रहरी कार्यालय झापाका प्रहरी निरीक्षक महेन्द्र पराजुलीले प्रस्तुत गरेका थिए । उनले पीडितले सत्य कुरा नबताउँदा, उजुरी फिर्ता लिँदा, उल्टो बयान दिँदा, सहमतिको नाममा प्रमाण नष्ट गराउने प्रवृत्ति, पीडकलाई बचाउन विभिन्न गतिविधि गर्दा पीडितले न्याय पाउन समस्या भएको बताए ।
पत्रकार महासङ्घ झापाका पूर्व अध्यक्ष तारामणि सापकोटाले सबैका लागि सञ्चार निष्पक्ष आवाज बन्नुपर्ने जोड दिए । उनले संविधानले दिएको अधिकार स्थापित गर्न सञ्चार माध्यमले वकालत गर्नुपर्नेमा जोड दिए ।
महासङ्घ झापाकी उपाध्यक्ष तथा महिला विभाग संयोजक सुशीला सङ्ग्रौलाको अध्यक्षतामा भएको कार्यक्रममा अधिवक्ता रञ्जिता कार्की, महिला अधिकारकर्मी तथा सामाजिक संस्थाका प्रतिनिधिहरू राधा सुब्बा, पार्वता खरेल विमली, यशोदा उप्रेती, सङ्गीता गिरी, युनिता दवाडी, अधिकारकर्मी दीपक दास लगायतले विभिन्न जिज्ञासा र सुझाव राखेका थिए ।
त्यस्तै नेपाल प्रेस युनियन कोशीका उपाध्यक्ष ज्ञानेन्द्र निरौला, महासङ्घका सहसचिव तथा युनियन झापाका सचिव अर्जुन राजवंशी, नारी सञ्चार गृहकी अध्यक्ष रोजिना रोदन, पूर्व अध्यक्ष अम्बिका भण्डारी, सञ्चारीका समूह झापाकी अध्यक्ष लीला अनमोलले समेत कमजोरी सच्याएर सञ्चार क्षेत्र अझ जिम्मेवार ढङ्गले अघि बढ्ने हो भने लैङ्गिक हिंसा न्यूनीकरणमा टेवा पुग्ने बताए ।
नेपाल पत्रकार महासङ्घ झापाका अध्यक्ष एकराज गिरी, कोसी प्रदेश समितिका सदस्य लीलाराज झापाली, नेपाल प्रेस युनियन झापाका अध्यक्ष गिरीराज भट्टराई, समाजवादी प्रेस सङ्गठन झापाका संयोजक अनिलदेव राई, फोनिज झापाका पूर्व अध्यक्ष गणेशमान मुखिया लगायतले समेत सुझाव र प्रतिक्रिया राखेका थिए ।
कार्यक्रमको सञ्चालन महासङ्घ झापाकी कार्यसमिति सदस्य स्वस्तिका आचार्यले गरेकी थिइन् ।
लैङ्गिक हिंसाविरुद्धको १६ दिने अभियान अन्तर्गत ‘लैङ्गिक हिंसा अन्त्यको सुनिश्चितता महिला र बालबालिकामा लगानीको ऐक्यबद्धता’ भन्ने नाराका साथ पत्रकार महासङ्घ झापाको महिला विभागले अन्तरक्रिया आयोजना गरेको थियो । अन्तरक्रियामा विभिन्न क्षेत्रका सरोकारवाला तथा सञ्चारकर्मीको उल्लेख्य सहभागिता रहेको थियो ।
Discussion about this post