झापा । नेपाली कांग्रेस झापाको आइतवार सम्पन्न विस्तारित बैठकले शहीद दिवसको अवसर पारेर यही माघ १६ गते नेपाली कांग्रेसका अग्रज नेता, प्रजातान्त्रिक योद्धा र शहीदहरुको सम्झना र सम्मानमा विभिन्न १० स्थानमा कार्यक्रम गर्ने निर्णय गरेको छ ।
नेपाली कांग्रेस झापाका सभापति देउकुमार थेवेको सभापतित्व र केन्द्रीय प्रतिनिधि मधु आचार्यको प्रमुख आतिथ्यमा जिल्लाका पदाधिकारी, सदस्य, क्षेत्रीय, प्रदेशसभा क्षेत्रीय, गाउँ-नगर सभापतिहरुको सहभागितामा सम्पन्न जिल्ला समितिको विस्तारित बैठकले कांग्रेसका अग्रज नेता एवम् शहीदहरुको प्रतिमामा माल्यार्पण एवम् स्मृतिसभा गरी शहीद दिवससँगै समुदायमा कांग्रेस अभियान शुभारम्भ गर्ने निर्णय गरेको हो ।
जस अन्तर्गत क्षेत्र नं. १मा याम आचार्य स्मृति प्रतिष्ठान बुद्धशान्तिमा पार्टीका उपसभापति केशवराज पाण्डे, शहीद विश्वनाथ घिमिरे स्मृति प्रतिष्ठान बाहुनडाँगीमा समुदायमा कांग्रेस अभियानका केन्द्रीय प्रतिनिधि मधु आचार्य र वीपी स्मृति प्रतिष्ठान चन्द्रगढीमा जिल्ला सचिव कृष्ण हुमागाँईलाई प्रतिनिधि पठाउने निर्णय भएको छ ।
यसैगरी क्षेत्र नं. २ अन्तरगत सीके चिन्तन प्रतिष्ठानमा राष्ट्रियसभा सदस्य गोपालकुमार बस्नेत र जिल्ला कोषाध्यक्ष जलकुमार गुरुङ, बुटन चौधरी स्मृति प्रतिष्ठानमा कालेन्द्रप्रसाद सिंह राजवंशी, शहीद राजन गिरी स्मृति प्रतिष्ठान अर्जुनधारामा जिल्ला सचिव नवीन बिमलीलाई प्रतिनिधि पठाउने निर्णय बैठकले गरेको छ ।
यसैगरी झापा क्षेत्र नं. ३ अन्तर्गत राम थापाको शालिकस्थल भद्रपुरमा सचिव नवीन बिमली र चन्द्रमणि भट्टराई स्मृति प्रतिष्ठान कचनकबलमा नेपाली कांग्रेस कोशी प्रदेश सभापति उद्धव थापालाई प्रतिनिधि तोकिएको छ ।
यसैगरी झापा क्षेत्र नं. ४मा तुर्सा हेमरम स्मृति प्रतिष्ठानमा पार्टीका सभापति देउकुमार थेवे, श्यामसुन्दर यादवको स्मृतिसभा वीपी स्मृति भवन गौरादहमा उपसभापति शेरबहादुर भट्टराईलाई प्रतिनिधि तय गरिएको नेपाली कांग्रेस झापाका कार्यालय सचिव जयकुमार दाहालले जानकारी दिए ।
पार्टीका अग्रज नेता एवम् शहीदहरुको सम्मान र स्मृतिमा हुने कार्यक्रमकाबीच जनताका अपेक्षा, सुझाव र गुनासो सुनेर सम्बन्धित तहमा कार्यान्वयनका लागि पहलकदमी गर्ने र पार्टीको नीति निर्माणमा समेट्ने उद्देश्यसहित नेपाली कांग्रेसले यही माघ १३ गतेदेखि २६ गतेसम्म सञ्चालन गरेको समुदायमा कांग्रेस अभियानको पनि शुभारम्भ गरिनेछ ।
नेपाली कांग्रेस केन्द्रीय समितिको निर्णय बमोजिम यसअघि आन्तरिक विशेष अभियान सम्पन्न गरेको कांग्रेसले समुदायमा कांग्रेस अभियान सञ्चालन गरेको हो । अभियान सञ्चालनका लागि कांग्रेस केन्द्रीय सदस्य मधु आचार्य प्रतिनिधिका रुपमा झापा आइसकेका छन् ।
अभियानकै क्रममा यही माघ १८ गते महासमिति सदस्य, महाधिवेशन प्रतिनिधि, जिल्ला सदस्य, क्षेत्रीय सभापति, प्रदेश क्षेत्रीय सभापति, गाउँ-नगर सभापतिहरुका लागि अभिमुखीकरण कार्यक्रम जिल्ला पार्टी कार्यालयमा दिनको ११ बजेदेखि आयोजना गरिएको छ ।
माघ २४ गते जिल्लाका १३१ वटै वडामा जिल्ला प्रतिनिधिहरुको उपस्थितिमा दिनको ११ बजे एकै समयमा समुदायमा कांग्रेस अभियान अन्तरगत जनतासँग संवाद कार्यक्रम सञ्चालन गर्ने निर्णय बैठकले गरेको बताइएको छ ।
अभियानका क्रममा खुल्ला छलफल, समूहगत छलफल, निर्दिष्ट भेटघाट, सेवा प्रवाह अवलोकन, स्थानीय सरकार–वडा कार्यालयमा भ्रमण र संवाद लगायतका कार्यक्रम तय गरिएको केन्द्रीय प्रतिनिधि आचार्यले जानकारी दिए ।
उनका अनुसार खुल्ला छलफलमार्फत तीनै तहका सरकारसँग जनताका अपेक्षा, गुनासा सुन्दै सुझाव संकलन गर्ने, समूहगत छलफलमा वडास्थित नागरिक समाज, शिक्षक, प्राध्यापक, आमा समूह, युवा समूह, कृषक समूह, स्वास्थ्य समितिहरु, ब्यवसायिक समूहसँग, मजदुरसँग छलफल गरिने छ ।
यसैबीच बैठकले राष्ट्रियसभा सदस्यमा निर्वाचित नेपाली कांग्रेसका नेता एवम् पूर्वमहामन्त्री कृष्णप्रसाद सिटोलालाई बधाई दिँदै सम्पूर्ण मतदाता जनप्रतिनिधिहरुमा धन्यवाद ज्ञापन गर्ने निर्णय गरेको छ ।
Discussion about this post