मोरङको बुढीगंगामा नहरले बगाएर ल्याएको महिलाको शव फेला

विराटनगर । मोरङको बुढीगंगा गाउँपालिका–७ मा शुक्रबार बिहान एक जना महिलाको शव नहरले बगाएर ल्याइरहेको अवस्थामा फेला परेको छ ।

सुनसरी–मोरङ सिँचाइ आयोजनाको नहरमा करिब ३० देखि ३२ वर्ष उमेरकी देखिने महिलाको शव बिहान करिब ८ः३० बजे भेटिएको मोरङ प्रहरी प्रवक्ता डीएसपी कोपिला चुँडालले जानकारी दिइन् । उनका अनुसार शवलाई तत्कालै नहरबाट बाहिर निकालिए पनि मृतकको परिचय हालसम्म खुल्न सकेको छैन ।

‘स्थानीयवासीले नहरमा महिला बगिरहेको देखेपछि प्रहरीलाई खबर गरेका थिए । प्रहरी चौकी कोयलपुरबाट खटिएको टोलीले शव बाहिर निकालेको हो,’ डीएसपी चुँडालले भनिन्, ‘पहिचानका लागि सबैतिर हुलिया पठाइएको छ । तर, अहिलेसम्म सनाखत हुन सकेको छैन ।’

घटनास्थलमा पुगेको इलाका प्रहरी कार्यालय बेलबारीका इन्स्पेक्टर कृष्णबहादुर खत्री नेतृत्वको टोलीले आवश्यक कानुनी प्रक्रिया पूरा गरी शवलाई पोस्टमार्टमका लागि कोशी अस्पताल विराटनगर पठाएको छ । प्रहरीले महिलाको मृत्यु दुर्घटनावश भएको वा अन्य कुनै घटनासँग सम्बन्धित छ भन्नेबारेमा अनुसन्धान सुरु गरिएको जनाएको छ ।