धनकुटाका मगरको कुवेतमा मृत्यु भएको खबर सुनेपछि श्रीमतीको पनि मृत्यु, तीन छोरीको विचल्ली

धनकुटा : धनकुटाको महालक्ष्मी नगरपालिका–१ कटहरेमा श्रीमान्–श्रीमतीको अकाल मृत्युपछि तीन छोरी विचल्लीमा परेका छन्। महालक्ष्मी–१ का ४३ वर्षीय डम्बर मगर र ३४ वर्षीया विद्या मगरको केही दिनको फरकमा निधन भएपछि उनीहरुको तीन छोरी अभिभावकविहीन बनेका हुन्।

वैदेशिक रोजगारीको सिलसिलामा करिब दुई वर्षअघि कुवेत गएका डम्बर मगरको करिब १० दिनअघि विषाक्त मदिरा सेवनका कारण मृत्यु भएको थियो। पतिको निधनको खबर थाहा पाएलगत्तै बेहोस भएकी पत्नी विद्याको समेत तीन दिनमै मृत्यु भयो। एकै परिवारका अभिभावकको अकाल मृत्युले उनीहरुको तीन छोरी १७ वर्षीया विपना मगर, १६ वर्षीया सञ्जु मगर र दुई वर्षीया संयुक्त मगर विचल्लीमा परेको मृतकका भाइ तथा वडासदस्य घनेन्द्र मगरले जानकारी दिए।

जेठी र माइली छोरी धनकुटा नगरपालिका–५ तल्लोटुँडिखेलस्थित गोकुण्डेश्वर बालमन्दिर विद्यालयमा क्रमशः कक्षा–१२ र ११ मा अध्ययनरत छन् भने कान्छी छोरी संयुक्त दुई वर्षकी मात्र भएकी छिन्। आमाबाबुको मृत्युले छोरीहरुको लालनपालन र शिक्षामा गम्भीर संकट खडा भएको परिवारले बताएको छ।

हाल जेठी र माइली धार्मिक परम्परा अनुसार किरियापुत्री बसेका छन् भने डम्बरको शव अझै कुवेतमै रहेको छ। शव नेपाल ल्याउन पहल भइरहेको भए पनि प्रक्रिया लामो भइरहेको वडासदस्य मगरले बताए।

स्थानीय वडाध्यक्ष टेकबहादुर गुरुङका अनुसार मगर दम्पत्तिको असामयिक निधनले पूरै वडा शोकमा डुबेको छ। छोरीहरुको पुनःस्थापनाका लागि स्थानीय स्तरमै पहल सुरु गरिएको र माइली छोरीको नाममा बैंक खाता खोलेर सहयोग संकलन अभियान सुरु भएको उनले बताए।

कुवेतमा विषाक्त मदिरा सेवनका कारण २२ भन्दा बढी नेपालीले ज्यान गुमाइसकेका छन् भने कैयौं अस्पतालमा उपचाररत छन्। यो घटनाले वैदेशिक रोजगारीमा रहेका नेपालीको असुरक्षा र परिवारको पीडा झन् उजागर गरेको छ।