महाकालीको कटानले दोधारा चाँदनीको कुतियाकवर बस्ती जोखिममा

कञ्चनपुर :  महाकाली नदीको निरन्तर कटानका कारण कञ्चनपुरको दोधारा-चाँदनी नगरपालिका-१० मा रहेको कुतियाकवर बस्ती उच्च जोखिममा परेको छ।

पूर्वमा महाकाली र उत्तरमा जोगबुढा नदीको दोसाँधमा अवस्थित यो बस्तीमा नदीको कटानले ठूलो क्षति पुगेको छ।

स्थानीय बासिन्दाका अनुसार नदीको कटानका कारण यहाँको दुई बिघाभन्दा बढी जमिन नदीमा समाहित भइसकेको छ।

सरकारसँग पटक-पटक आग्रह गर्दा पनि तटबन्ध निर्माण नहुँदा बस्ती साँघुरिँदै गएको र धेरै परिवारहरू विस्थापित भइसकेका छन्। यसअघि १५० परिवार बसोबास गर्ने यो बस्तीमा अहिले बाढी र कटानका कारण १०० भन्दा बढी परिवार विस्थापित भएका छन्।

नगरपालिकाका प्रमुख किशोर लिम्बूले बस्ती जोगाउन दुई वटा सेफहाउस निर्माण गरिएको र मानवीय क्षति हुन नदिन संयन्त्र बनाएर काम गरिरहेको बताए। उनका अनुसार जोगबुढा नदीमा तटबन्ध निर्माणको काम सुरु भए पनि पानीको सतह बढेपछि रोकिएको छ।