सेफर्ड चिल्ड्रेन एकेडेमीका सञ्चालकमाथि अनियमितताको आरोप, शिक्षक रञ्जित शाहले गरे यस्तो खुलासा

इटहरी : इटहरी–४ हरियाली मार्गस्थित सेफर्ड चिल्ड्रेन एकेडेमी विद्यालयका पूर्व–सञ्चालक तथा शिक्षक रञ्जितकुमार शाहले विद्यालयका प्रमुख सञ्चालक मिलन राईमाथि विभिन्न अनियमितता भएको दाबी गर्दै पत्रकार सम्मेलन गरेका छन्। एक समय सोही विद्यालयमा साझेदार तथा कर्मचारीका रूपमा काम गरेका शाहले विद्यालय व्यवस्थापनमा देखिएका समस्या र आफूले भोग्नुपरेको अवस्थाका बारेमा सार्वजनिक रूपमा जानकारी दिएका हुन्।

शाहका अनुसार करिब ८० लाख रुपैयाँमा विद्यालय बिक्री गर्ने प्रक्रिया अघि बढिरहेको बेला आवश्यक कागजात अपूरो थियो र अर्का सञ्चालक शिवप्रसाद तिम्सिनासँग पनि सम्पर्क हुन सकेको थिएन। त्यस्तो अवस्थामा प्रक्रिया अघि नबढ्नुपर्ने भए पनि विद्यालय “उपयुक्त कागजात नपुगी राईको नाममा नामसारी गरिएको” आरोप शाहले लगाए।

उनले आफूलाई दिनुपर्ने रकम नदिएको र सात महिनाको तलब रोकेको गुनासो पनि पत्रकार सम्मेलनमा राखे। विद्यालयमा देखिएको विवाद न्यायिक समितिमा पुगेर निर्णय आउने तयारी भइरहँदा सञ्चालक राई सम्पर्कविहीन भएको दाबी पनि उनले गरे।

शाहका साथमा रहेका केही शिक्षक–कर्मचारीहरूले पनि विद्यालयमा तलब समयमै नपाउने, कागजात व्यवस्थापनमा समस्या देखिने, केही प्रशासनिक प्रक्रियामा अस्पष्टता रहने जस्ता विषयबारे आफ्नो गुनासो राखेका थिए। उनीहरूको भनाइमा विद्यालयका निर्णयहरू पारदर्शी रूपमा नहुने, कागजात तथा प्रमाणपत्र वितरणमा ढिलाइ हुने जस्ता समस्याले शिक्षक र अभिभावक दुबै प्रभावित हुने अवस्था बनेको छ।

उक्त आरोपबारे सञ्चालक मिलन राईतर्फबाट भने अहिलेसम्म कुनै आधिकारिक प्रतिक्रिया आएको छैन। 

रञ्जित शाहले विद्यालयमा देखिएको विवादबारे सम्बन्धित निकायले सत्यतथ्य छानबिन गर्न आग्रह गर्दै आफूले भोग्दै आएको अवस्थाको न्यायिक समाधान खोजिरहेको बताए।