इलाममा ट्रक–स्कुटर दुर्घटना : दुईजनाको मृत्यु

इलाम : मेची राजमार्गअन्तर्गत इलाम नगरपालिका–९ भञ्ज्याङमा आज दिउँसो भएको सवारी दुर्घटनामा दुईजनाको मृत्यु भएको छ। झापाबाट इलामतर्फ आइरहेको प्रदेश १–०१–००१ ख ४१०१ नम्बरको ट्रक र विपरित दिशातर्फ जाँदै गरेको प्रदेश १–०१–०१२ प ४८९९ नम्बरको स्कुटर आपसमा ठोक्किँदा स्कुटरमा सवार दुई युवकको ज्यान गएको जिल्ला प्रहरी कार्यालय इलामले जनाएको छ।

मृत्यु हुनेमा इलाम नगरपालिका–९ गोलबस्तीका २६ वर्षीय डेविट थापा मगर र माईजोगमाई गाउँपालिका नयाँबजार घर भई इलाम नगरपालिका–७ चोक बजार बस्दै आएका १९ वर्षीय छ्वाङ शेर्पा रहेको प्रहरीले पुष्टि गरेको छ।

थापा मगरको पेटमा गम्भीर चोट लागेको थियो भने शेर्पाको टाउको र खुट्टामा गम्भीर चोट लागेर दुवैजनालाई इलाम अस्पताल पुर्‍याइएको थियो। उपचारको क्रममा चिकित्सकले दुईजनैलाई मृत घोषणा गरेको अस्पताललाई उद्धृत गर्दै प्रहरीले जानकारी दिएको छ।

दुर्घटनामा संलग्न ट्रक चालक इलाम नगरपालिका बिब्ल्याटेका २५ वर्षीय रामप्रसाद श्रेष्ठलाई प्रहरीले नियन्त्रणमा लिएर अनुसन्धान सुरु गरेको जनाएको छ। घटनाको थप अनुसन्धान भइरहेको छ।