एकलाख राशिको नृत्य प्रतियोगिता धरानमा

धरान।विजेतालाई एक लाख रुपैयाँ पुरस्कारसहित ट्रफी प्रदान गरिने ‘स्कूल डान्स आइडल २०८२’ नृत्य प्रतियोगिता आगामी पुस १४ गते धरानमा हुने भएको छ। 

युनाइटेड डान्स एकेडेमी धरानको नवौं संस्करण अन्तर्गत आयोजना हुने प्रतियोगितामा धरानका ४४ विद्यालयका ५ हजार ३ सय ३५ विद्यार्थी सहभागी भएका थिए।

गत जेठ २६ गतेबाट सुरु भएको प्रतिस्पर्धाबाट हाल उत्कृष्ट १० जना विद्यार्थी चयन भइसकेका छन्। यी १० प्रतिस्पर्धीबीच पुस १४ गते अन्तिम चरणको प्रतिस्पर्धा हुनेछ। प्रतियोगिताका विजेताले एक लाख नगद, ट्रफी र प्रमाणपत्र प्राप्त गर्ने जानकारी युनाइटेड डान्स एकेडेमी धरान–९ का अध्यक्ष सन्तोष तामाङले दिए।

अन्तिम प्रतिस्पर्धामा सहभागी हुने विद्यार्थीहरूमा सियोन स्कूलकी प्रयुसा राई, युनाइटेड गोर्खाकी दिपशीखा राई, होलिल्यान्ड स्कूलका हिमाल तामाङ, शिक्षा सन्देश स्कूलकी आयुष्मा कटवाल, शिक्षा सन्देश स्कूलकी नुयङ्मी राई, भिक्टोरी स्कूलकी टीका मगर, पर्वत स्कूलकी युनिशा राई, सिर्जना स्कूलकी सुनैना सेन्चुरी, विष्णु मेमोरियल स्कूलकी इशा राई र युएन स्कूलकी रुबिना लिम्बू छन्।

शनिबार पत्रकार सम्मेलनमार्फत आयोजकले प्रतियोगितामा प्रदान गरिने ट्रफी सार्वजनिक गरेको थियो। अग्रज पत्रकार तथा मजदुर नेता भिमज्वाला राईको हातबाट ट्रफी सार्वजनिक गरिएको हो। सो पत्रकार सम्मेलनको अध्यक्षता हर्क तामाङले गरेका थिए। सम्मेलनमा अन्तिम प्रतिस्पर्धी विद्यार्थी, उनीहरूका अभिभावक तथा अघिल्लो वर्षका विजेता समेत सहभागी गराइएको थियो।

"कला तपाईंको, मञ्च हाम्रो" नारा रहेको डान्स आइडललाई आगामी वर्ष थप परिष्कृत गर्दै लैजाने योजना रहेको अध्यक्ष तामाङले बताए।