अरुण तेस्रोमा कामदारबिच विवाद, चक्कु प्रहार हुँदा एक जना घाइते

झापा । सङ्खुवासभाको चिचिला गाउँपालिका– ३ स्थित निर्माणाधीन अरुण तेस्रो जलविद्युत् परियोजनाको साइटमा दुई जना कामदारबिच भएको विवाद चक्कु प्रहारसम्म पुगेको छ। पटेल कम्पनीमार्फत निमा निर्माण सेवामा कार्यरत दुईजना बिच  सामान्य भनाभन झगडामा बदलिँदा एक जना घाइते भएका छन्।

भोजपुर साल्पा सिलिछो गाउँपालिका–०४, खाटाम्माका २४ वर्षीय विनोद कुमार राई र खाँदवारि नगरपालिका– ६, खानिडाँडाका ३७ वर्षीय देवबहादुर तामाङ बिच विवाद चर्किएपछि विनोदले चक्कु प्रहार गरेको प्रहरीले जनाएको छ।

घाइते तामाङको दाहिने कान र टाउकोमा चोट लागेको छ। उनको अवस्था सामान्य रहेको र परियोजना परिसरकै मेडिकलमा प्रारम्भिक उपचारपछि थप उपचारका लागि जिल्ला अस्पताल खाँदवारि पठाइएको जिल्ला प्रहरीले जानकारी दिएको छ।