लागुऔषध मुक्त बनाउन काम गर्छु : वडा प्रहरी प्रमुख दाहाल

धरान । धरानलाई लागुऔषध सेवन, ओसारपसार र बेचबिखनबाट पूर्णरूपमा मुक्त बनाउन प्रभावकारी अभियान सञ्चालन गर्ने प्रतिबद्धता वडा प्रहरी कार्यालय धरानका प्रमुख, वरिष्ठ प्रहरी नायव निरीक्षक राधाकृष्ण दाहालले जनाएका छन्।

आइतबार नेपाल यातायात स्वतन्त्र मजदुर संगठन धरानले आयोजना गरेको स्वागत कार्यक्रममा दाहालले धरान ‘लागुऔषधको हब’ बन्दै गएको टिप्पणी गर्दै यसलाई तोड्ने गरी कडा र रणनीतिक कार्य सुरु गर्ने बताए। उनले धरानका १० वडाको शान्ति–सुरक्षाको जिम्मेवारी वडा प्रहरीले सम्हाल्ने उल्लेख गर्दै भानुचोक क्षेत्रलाई व्यवस्थित र सुरक्षित बनाउन सबै निकायको सहकार्य आवश्यक भएको बताए।

बुधबारदेखि धरान वडा प्रहरी प्रमुखका रूपमा जिम्मेवारी सम्हालेका दाहाललाई स्वागत गर्दै कार्यक्रमका प्रमुख अतिथि तथा संगठनका केन्द्रीय अध्यक्ष, अग्रज पत्रकार भीमज्वाला राईले बसपार्क क्षेत्रमा भइरहेका अवाञ्छित गतिविधि नियन्त्रण, सडक बालबालिकाको व्यवस्थापन, लागुऔषध कारोबार नियन्त्रण, तथा झैझगडा र गुण्डागर्दी रोकथाम वडा प्रहरी कार्यालयका प्रमुख चुनौती रहेको टिप्पणी गरे। राईले यी क्षेत्र व्यवस्थित गर्न सकेमा धरानका नागरिकले प्रत्यक्ष राहत पाउने उल्लेख गरे।

राईले बसपार्कमा काम गर्ने श्रमिकहरूलाई यात्रुमैत्री बनाउन, यात्रु तानातान अन्त्य गर्न तथा सडक सुरक्षाबारे सचेतना अभियान सञ्चालनमा प्रहरीसँग सहकार्य गरिने प्रतिवद्धता जनाए। संगठन र यातायात मजदुरको तर्फबाट यात्रुको सुरक्षित यात्राका लागि आवश्यक समन्वय गर्दै जाने पनि उनले बताए।

यसअघि झापाको इप्रका सुरुङ्गामा कमाण्ड सम्हाल्दा ठूलो परिमाणमा लागुऔषध नियन्त्रणमा सफलता हात पारेका दाहालको अनुभव धरानमा पनि उपयोगी हुने अपेक्षा सहभागीहरूले व्यक्त गरेका थिए। कार्यक्रममा मजदुर पृष्ठभूमिबाट उदाएका धरान–८ का वडा अध्यक्ष धनबहादुर राई, धरान–१५ का सदस्य रंगलाल गिरी, एमाले सुनसरीका सदस्य नारायण सुवेदीलगायत विभिन्न क्षेत्रका श्रमिकहरूको उपस्थिति रहेको थियो।

नेपाल यातायात स्वतन्त्र मजदुर संगठन धरानका अध्यक्ष किरण थापाको अध्यक्षतामा भएको कार्यक्रम केन्द्रीय सदस्य लक्ष्मी बानियाँले सञ्चालन गरेका थिए।