ओखलढुंगामा ओलीलाई धक्का

काठमाडौं। यतिबेला एमाले ११ औं महाधिवेशनको संघारमा छ। देशभर प्रतिनिधि छनाोटको काम चलिरहेको छ। शनिबार देशभर प्रतिनिधि छनोट गरिएको थियो।

केही स्थानमा तनाव भएपनि अन्य स्थानमा शानितपूर्ण रुपमा प्रतिनिधि छनोटको काम सम्पन्न भएको एमालेले जनाएको छ। धेरै ठाउँमा सर्वसम्मत प्रतिनिधि चयन भएपनि केही जिल्लामा भने निर्वाचनमार्फत प्रतिनिधि चयन भएका छन्।

एमालेमा महाधिवेशमा वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलबीच प्रतिस्पर्धा हुँदैछ। जसको असर प्रतिनिधि छनोटमा समेत देखिएको छ। प्रतिनिधि छनोटका लागि गत बिहीबार उम्मेदवारी दिइएको थियो। सर्वसम्मत् हुन नसकेको ठाउँमा शनिबार मतदानबाटै प्रतिनिधि छनोट गरिएको एमालेले जनाएको छ।

महाधिवेशनका लागि संघीय निर्वाचन क्षेत्रबाट खुला, महिला, दलित तथा युवासहित करिब २ हजार प्रतिनिधि छनोट गरिएको छ भने प्रवास, जनसंगठन र विभागबाट करिब १ सय प्रतिनिधि छनोट हुने एमालेले जनाएको छ।

विधान संशोधनगरेर ७० वर्षे उमेर हद हटाएपछि दुवै उम्मेदर चुनावी मैदानमा देखिन पाएका हुन् भने दुई कार्यकालमात्र अध्यक्ष उठ्न पाउने व्यवस्था संशोधन भएपछि ओली पुनः प्रतिस्पर्धामा छन्। शनिबार भएको महाधिवेशन प्रतिनिधि छनोटमा ७५ प्रतिशतबढी ओलीनिकटका चयन भएको संस्थापन पक्षको दाबी छ।

तर ओलीकै प्रभाव रहेका क्षेत्रमा भने ईश्वर पोखरेल निटक प्रतिनिधि चयन भएका छन्। ओखलढुंगा, मोरङलगायताका जिल्लामा पोखरेल निकटका प्रतिनिधि निर्वाचित भएका छन्। ओखलढुंगाबाट सबै प्रतिनिधि पोखरेल पक्षका विजयी भएका छन्।

ओखलढुंगाबाट १२ जना प्रतिनिधि चयन भएका हुन्, जसमा खुलातर्फ अम्बिरबाबु गुरुङ, ज्ञानबहादुर खड्का, कमलप्रसाद न्यौपाने, अशोक थापा, राजीव कटवाल र केदारबाबु बस्नेत विजयी भएका छन्। त्यस्तै, महिलातर्फ इच्छाकुमारी गुरुङ, जुना विक, पशुपति गुरुङ र रमिला मगर श्रेष्ठ निर्वाचित भएका छन् । युवातर्फ टिकाराम धमला र दलिततर्फ ज्यानु कालिकोटे महाधिवेशन प्रतिनिधि चयन भएका छन्। उपाध्यक्ष पोखरेलको गृह जिल्ला ओखलढुंगा हो।

उता संस्थापन पक्षले भने जिल्ला कमिटी नेतृत्वले व्यक्तिको स्वार्थमा विधि मिचेर एकलौटी गर्न खोजेको भन्दै २० उम्मेदवारले निर्वाचन प्रक्रिया नै अस्वीकार गरेका छन्। उनीहरूले पत्रकार सम्मेलन गर्दै निर्वाचन प्रक्रिया बहिष्कार गरेको घोषणा गरेका हुन्।

नेताहरू हर्कबोल राई, शकुन्तला राजभण्डारी, पूर्व जिल्ला कमिटी अध्यक्ष तथा पूर्वमेयर मोहनकुमार श्रेष्ठ, जिल्ला कमिटी उपसचिव अस्मिता थापालगायतले नेतृत्वप्रति असन्तुष्टि जनाउँदै विधिसम्मत प्रक्रियामा जान आग्रह गरेका हुन्।