एनसेलको ‘एनपीएल प्ले प्याक’मा डिशहोम गो एपमार्फत खेल लाइभ हेर्न सकिने

काठमाडौं । एनसेलले नेपाल प्रिमियर लिग (एनपीएल) दोस्रो संस्करणको डिजिटल स्ट्रिमिङ पार्टनर डिशहोमसँगको सहकार्यमा ग्राहकका निम्ति एनपीएल प्ले प्याक सञ्चालनमा ल्याएको छ । यो प्याकका साथ ग्राहकले डिशहोम गो एपमार्फत हाल भइरहेका खेलको मजा आफ्नै मोबाइलमा लिन सक्नेछन् ।

ग्राहकले एनपीएल दोस्रो संस्करणका खेलहरू सहज रूपमा हेर्न सकून् भन्ने उद्देश्यले एनपीएल प्ले प्याक सञ्चालनमा ल्याइएको एनसेलले जनाएको छ । ग्राहकले बन्डल भएर आउने थप डेटा र सुविधाका आधारमा करसहित २९९ रुपैयाँ पर्ने यो एपीएल प्ले प्याक लिन सक्छन् । प्याकमा खेलको लाइभ मजा लिन डिशहोम गो एपमा सहज पहुँच सुनिश्चिन गरिएको छ ।

एनपीएल प्ले प्याकमा ग्राहकले २८ दिनका निम्ति मान्य रहने एक जीबी डेटा बन्डल सेवाका रूपमा पाउँछन् । ग्राहकले एनसेल एप वा एस्ट्रिक १२३ ह्यास डायल गरी सहजै यी प्याक खरिद गर्न सक्छन् । मुलुकभर रहेका एनसेलका खुद्रा विक्रेतामार्फत पनि प्याक खरिद गर्न सकिन्छ ।

प्याक लिएपछि ग्राहकले आफ्नो मोबाइल नम्बरमा प्राप्त एसएमएफमार्फत डिशहोम गो एप लगइन गरी एनपीएलका खेलहरू लाइभ हेर्न पाउँछन् ।

“बन्डल डेटाका साथ एनपीएल दोस्रो संस्करणका खेलहरू हाम्रा ग्राहकहरूले प्याकमार्फत मोबाइलमा प्रत्यक्ष रूपमा हेर्न पाउने व्यवस्था गर्न पाएकोमा हामी निकै खुसी छौँ,” एनसेलका चिफ कन्जुमर बिजनेस अफिसर उपङ दत्तले भने, “डिशहोमसँगको हाम्रो यो साझेदारीले ग्राहकहरूलाई निर्बाध रूपमा एनपीएलका खेलहरू लाइभ खेल हेर्ने सुविधा प्रदान गरेको छ । यसले सबैलाई जोड्ने क्रिकेट खेलको रोमाञ्चकतालाई झन बढाउनेछ ।”

एनसेलले एनपीएलसँग पहिलो संस्करणमा जस्तै दोस्रोमा पनि ‘पावर्ड वाइ’का रूपमा सहकार्य जारी राखेको छ । यसपटक ‘युनाइटेड वाइ क्रिकेट, कनेक्टेड वाइ एनसेल’ भन्ने नाराका साथ एनसेल एनपीएलमा आबद्ध छ । एनपीएलका खेलहरूलाई थप रोमाञ्चक बनाउन एनसेलले एनपीएल फ्यान प्याकहरू पनि सर्वाजनिक गरिसकेको छ ।

यस्तै, एनसेल फाउन्डेसनले पनि गत वर्षजस्तै यसपालि पनि व्यावसायिक सामाजिक जिम्मेवारीअन्तर्गतको कामलाई जारी राखेको छ । त्यसमा एनपीएलका खेलमा प्रहार हुने प्रत्येक चौकाबापत एनसेलले ग्रामीण र दुर्गम क्षेत्रका सामुदायिक विद्यालयहरूमा अध्ययनरत विद्यार्थीहरूलाई चारवटा शैक्षिक सामग्री प्रदानको घोषणा गरिएको छ ।