एमाले महाधिवेशन प्रतिनिधि छनौटमा सुनसरी क्षेत्र नम्बर एकका दुवैजना कोशी प्रदेशसभा सदस्य पराजित

धरान । नेकपा एमालेको आसन्न ११ औँ महाधिवेशनका लागि प्रतिनिधि छनौटका लागि भएको निर्वाचनमा कोशी प्रदेश सभाका सदस्य समेत रहेका रमेशकुमार बस्नेत र विजयकुमार राई नै पराजित भएका छन् । 

सुनसरी क्षेत्र नम्बर १ मा एमाले महाधिवेशनका लागि सहमतिमा प्रतिनिधि छनौट गर्ने प्रयास भएको र सहमति हुन नसक्दा विवाद र हात हालाहाल भएपछि शनिवार प्रतिनिधि छनौटका लागि भएको निर्वाचनमा कोशी प्रदेश सभाका सदस्य समेत रहेका बस्नेत र राई पराजित भएका हुन ।

निर्वाचनबाट खुल्लातर्फ आसाराम चौधरी, जयकुमार राई र मुरारी सुवेदी निर्वाचित भएका छन् । प्रतिनिधि छनौटका लागि भएको मतदानमा  ७९६ मत सुवेदीले ७७६ मत जयकुमारले ६७४ मत पाएर चौधरी निर्वाचित हुँदा पराजित प्रदेश सभा सदस्य समेत रहेका बस्नेत र राईले क्रमशः  ३७६ र ३९१ मत मात्र प्राप्त गरेका छन् । निर्वाचित  सुवेदी केपी ओली पक्षधर हुन् भने चौधरी र राई इतर पक्षका हुन् ।

महिलातर्फ सीता भण्डारी पौडेल र सुशीला पहाडी ढकाल निर्वाचित भएका छन् । महिलातर्फ निर्वाचित पौडेल र ढकाल दुवै जना ओली इतर पक्षका हुन ।

 युवातर्फ दिवस वान्तवा राई निर्वाचित भएका छन । युवातर्फ  कोशी प्रदेशका मुख्यमन्त्री हिक्मतकुमार कार्कीका जनसम्पर्क सल्लाहकार रवि खनाल र पूर्वमुख्यमन्त्री भीम आचार्यका स्वकीय सचिव अनिल राजधामी उम्मेदवार रहेका थिए । दुवै जना पराजित भएका छन् । 

युवातर्फ निर्वाचन नगरी सर्वसम्मत गर्ने भन्दै राजधामीलाई चुनाव अघि आक्रमण गरिएको र उम्मेदवारी फिर्ताको कागजमा हस्ताक्षर गराइएको भएपनि आफू उम्मेदवार कायम रहेको राजधामीले दाबी गरेका थिए ।  राजधामीको उम्मेदवारी कायम रहेपछि निर्वाचन गरिएको थियो ।

एमाले महाधिवेशनका लागि सुनसरी क्षेत्र नम्बर १ बाट प्रतिनिधि छनौटका लागि धरानमा निर्वाचन भएको थियो भने मतदानमा ४५ दशमलव ४५ प्रतिशत मात्र मत खसेको थियो ।