पहिचान भाषा संस्कृतिको संरक्षण पनि हो : मन्त्री राई

इलाम फागुन : कोसी प्रदेशका आन्तरिक मामिला तथा कानुन मन्त्री शमशेर राईले पहिचानको सवालमा वार्ताको ढोका प्रदेश सरकारले खोलेको बताएका छन् । पहिचान भनेको नाम मात्र नभएर पहिचानका अरू मुद्धाहरु महत्त्वपूर्ण भएको भन्दै उनले कोसी प्रदेश नाम कोसी नाम राख्दैमा सबै कुरा नबिग्रिएको बताए । नाम परिवर्तन समेत हुन सक्ने उनको सङ्केत छ । वार्ताको माध्यमबाट समस्याको समाधानमा सरकार रहेको उनको भनाई छ । शनिवार इलामको चुलाचुली स्थित बाल ज्योति माध्यमिक विद्यालयमा १४ औँ स्थानीय तह स्तरीय राष्ट्रपति रनिङ शील्ड प्रतियोगितामा उत्कृष्ट विद्यालय खेलाडी र शिक्षा सेवीहरुलाई सम्मान तथा पुरस्कृत गर्दै मन्त्री राईले स्थानीय स्तरमा भएका भाषा लिपि र संस्कृतिको संवर्द्धन गर्न प्रदेश सरकार प्रतिबद्ध भएको बताए । उनले सांस्कृतिक थलोको संरक्षण र सम्बद्र्धनमा जोड दिनुपर्ने औँल्याए । मन्त्री राईले पहिचान पक्षधर आन्दोलनकारीले आन्दोलनको स्वरूप परिवर्तन गर्ने र आन्दोलनकारीलाई सरकारले धरपकड नगर्ने समझदारी वार्ता मार्फत निर्माण भएको स्मरण गरे ।   उनले पहिचान पक्षधरहरूलाई आन्दोलनको स्वरूप परिवर्तन गर्न र छलफलमा आउन समेत आग्रह गरे । हाम्रो उपस्थिति हाम्रो भूगोलमा सम्मान समेट्न योग्य छ भन्ने चेत सबै नेतृत्वलाई दिन आवश्यक भएको उनको भनाई छ । मन्त्री राई सहितका अतिथिलाई साकेला सिली नाचका क्रममा सोई ढोले सोई किराँत प्रदेश खोइ भनेर गाएपछि पहिचानको लागि भएको सकारात्मक उपलब्धिको मन्त्रीले चर्चा गरेका थिए । चुलाचुली गाउँपालिकाका अध्यक्ष राजेन्द्र केरुङको अध्यक्षतामा भएको कार्यक्रममा प्रमुख जिल्ला अधिकारी इन्द्रदेव यादव, पञ्चकन्या आधारभूत विद्यालयका प्रधानाध्यापक सुरेन्द्र बहादुर कटुवाल समेतले मन्तव्य राखेका थिए । पालिकामा प्रतियोगिता सम्पन्न भएपश्चात् आउने १२ गते देखी जिल्ला स्तरीय रनिङ शिल्ड प्रतियोगिता माङ्सेबुङ गाउँपालिकामा हुने भएको छ ।