इटहरी (डेस्क) : ताप्लेजुङस्थित पाथिभरामा केबलकार निर्माण स्थगन गर्नुपर्ने मागसहित गरिएको विभिन्न आन्दोलनका कार्यक्रम स्थगित गरिएको छ ।
नेपाल सरकारको गृह मन्त्रालयबाट गठित वार्ता टोली र नो केबलकार समूहका प्रतिनिधिहरूबीच मंगलबार भएको वार्ताका क्रममा आन्दोलनका कार्यक्रम स्थगित गर्ने निर्णय भएको हो ।
निर्णयानुसार केबलकारको स्टेसनमाथिको निर्माण कार्य स्थगन गर्ने र स्टेसनका सन्दर्भमा मिति २०८१ माघ २७ गते हुने वार्तामा विस्तृत छलफल गर्ने, सरकारले घोषणा गरे बमोजिम आन्दोलनका क्रममा घाइते भएकाहरूको निःशुल्क र प्रभावकारी रूपमा स्वास्थ्य उपचार गर्ने सहमति भएको छ ।
यसैगरी २०८१ माघ १२ गते भएको घटनाको विषयमा छानबिन गरी कानुनी कारबाही गर्ने, आन्दोलनका क्रममा थुनामा रहेका थुनुवा बन्दीहरूको विना सर्त तत्काल रिहाइको प्रक्रिया प्रारम्भ गर्ने, मुक्कुमलुङ संरक्षक पक्षबाट अनिश्चितकालीन यातायात बन्द स्थगन गर्ने सहमति भएको छ ।
यस्तै, मुक्कुमलुङ संरक्षक पक्षधरहरूबाट वार्ताका दौरानमा माग भएका पाथिभरा केबलकार आयोजना निर्माणमा रहेका असहमति लगायतका विषयका सम्बन्धमा विस्तृत छलफल गर्न मिति २०८१ माघ २७ गते बिहान ११ः०० बजे वार्तामा बस्ने सहमति भएको हो ।
सोमबार र मंगलबार ललितपुरको हिमालयन होटलमा बसेको बैठकले सहमति जुटाएको हो।
युनिकोड
मिति रूपान्तरण
प्रदेश खबर
प्रतिक्रिया