ब्याङ्गलोरमा कञ्चनपुरकी किशोरीमाथि निर्घात कुटपिट, मामा पक्राउ

कञ्चनपुर : कञ्चनपुरको शुक्लाफाँटा नगरपालिका–५ की १८ वर्षीया एक नेपाली किशोरी भारतको बङ्गलोरमा बन्धक बनाएर निर्घात कुटपिटमा परेकी छन् । 

पीडित परिवारका अनुसार दुई वर्षअघि पढ्न भारत गएकी ती किशोरीमाथि गैरकानुनी विवाह, घरेलु हिंसा र यातना भएको खुलासा भएको छ ।

किशोरीलाई उनका मामा गणेश विष्टले पढाउन भनी भारतको बङ्गलोर लगेका थिए । तर, केही समयपछि आमाको निधन भएपछि परिवारसँग सम्पर्क टुटेको थियो । 

परिवारका अनुसार गणेश विष्टका भाइ नरेशले ती किशोरीसँग विवाह गरेका थिए र विवाहपछिको समयदेखि उनीमाथि निरन्तर कुटपिट तथा नियन्त्रणमा राखिएको थियो । 

किशोरीका काका पनि बङ्गलोरमै कार्यरत छन् । केही महिनाअघि पीडित किशोरीले उनलाई फोन गरेर नरेशले बारम्बार कुटपिट गर्ने र बाहिर जानसमेत नदिने गरेको गुनासो गरेकी थिइन् ।

गत आइतबार मामा गणेश विष्ट ती किशोरीलाई अचेत अवस्थामा लिएर नेपाल फर्किएका थिए । हाल उनको झलारीस्थित एक स्वास्थ्य संस्थामा उपचार भइरहेको छ ।

इलाका प्रहरी कार्यालय झलारीले किशोरीलाई लिएर आएका गणेश विष्टलाई पक्राउ गरेको छ । प्रारम्भिक अनुसन्धानमा गणेशले आफ्ना भाइ नरेशले किशोरीलाई कुटपिट गरेर हत्या गर्न खोजेपछि आफूले नेपाल ल्याएको बताएका छन् ।

त्यहाँका प्रहरी निरीक्षक राजेश बस्नेतले थप अनुसन्धान जारी रहेको जानकारी दिएका छन् ।