एलन मस्कसँगको मेरो सम्बन्ध अब समाप्त भयो : ट्रम्प

काठमाडौ । अमेरिकी राष्ट्रपति डोनाल्ड ट्रम्पले एलन मस्कसँगको आफ्नो सम्बन्ध अब समाप्त भएको बताएका छन्।

शनिबार एनबीसीसँगको एक अन्तर्वार्तामा ट्रम्पलाई मस्कसँगको उनको घनिष्ठ सम्बन्ध समाप्त भएको हो कि भनेर सोधिएको थियो, र उनले भने, “हो, मलाई यस्तै लाग्छ।”

उनलाई अर्को प्रश्न सोधियो ‘के उनी यो सम्बन्ध सुधार्न चाहन्छन् ।’ उनको जवाफ थियो, “होइन।” ट्रम्पको यो बयान सामाजिक सञ्जालमा ट्रम्प र मस्कबीचको झडपपछि आएको हो।

ट्रम्प र मस्कबीचको द्वन्द्व तब सुरु भयो जब एलन मस्कले ट्रम्पको कर र खर्च नीतिको खुलेआम आलोचना गरे, जुन उनको घरेलु नीतिहरूको प्रमुख प्रस्ताव हो।

धेरैजसो रिपब्लिकन नेताहरूले अझै पनि ट्रम्पलाई समर्थन गर्छन्। अमेरिकी उपराष्ट्रपति जेडी भान्सले मस्कले “अति प्रतिक्रिया” जनाएकाले सम्भवतः उनलाई पार्टीमा पुनः भर्ना नगरिने बताए ।

भान्सले एक पोडकास्टमा ट्रम्पमाथि मस्कको आक्रमण ठूलो गल्ती भएको पनि बताए। हप्तौंदेखि मस्कले ट्रम्पको “बिग ब्युटिफुल बिल” विधेयक कंग्रेसमा पारित हुँदै गर्दा यसको आलोचना गरिरहेका छन्।

मस्कले भने – यदि विधेयक पारित भयो भने यसले राष्ट्रिय घाटामा ट्रिलियन डलर थप्नेछ र डोगेको प्रमुखको रूपमा उनले गरेको कामलाई कमजोर पार्नेछ।

मस्कले आफ्नो सामाजिक सञ्जाल प्लेटफर्म एक्समा यसलाई “घृणित घोटाला” भने, यद्यपि उनले ट्रम्पको नाम सिधै लिएनन्। तर बिहीबार, ट्रम्पले पत्रकारहरूलाई मस्कको व्यवहारबाट “निराश” भएको बताए।