पूर्वराष्ट्रपति भण्डारी लक्षित ओलीको टिप्पणी, एमालेभित्र गुटबन्दी हुन दिइन्न

काठमाडौं : नेकपा एमाले अध्यक्ष केपी शर्मा ओलीले पूर्वराष्ट्रपति विद्यादेवी भण्डारीको पछिल्लो राजनीतिक सक्रियताप्रति असन्तुष्टि जनाउँदै पार्टीभित्र गुटबन्दीको प्रयास स्वीकार्य नहुने चेतावनी दिएका छन्।

अनेरास्ववियुको २४ औं महाधिवेशनको कीर्तिपुरमा उद्घाटन गर्दै ओलीले एमालेभित्र ‘फलाना महासचिव बन्ने, फलाना उपाध्यक्ष बन्ने’ भन्ने हल्ला चलाइन थालिएको बताए। उनले कुनै नाम नलिए पनि पूर्वराष्ट्रपति भण्डारी ओलीकै गृहजिल्ला झापामा सक्रिय भइरहेकी बेलामा यस्तो बताएका हुन् । 

‘तलतल ग्रुप बनेको सुनिन्छ, यस्तो ग्रुप पार्टीमा आवश्यक छैन,’ ओलीले भने, ‘बाहिर गएर पार्टीमाथि ढुंगा हान्ने कुरा आन्तरिक मानिन्न।’ चीन भ्रमणपछि भण्डारी झापा र आसपासका जिल्लामा पार्टी कार्यकर्तासँग भेटघाटमा व्यस्त छन्।

ओलीले भण्डारीको सक्रियता पार्टी कार्यकर्ताको मनस्थिति बिथोल्ने प्रयास भएको दाबी गर्दै यस्तो प्रवृत्तिबाट पार्टीलाई जोगाउनु पर्ने बताए। उनले महाधिवेशनबारे अझै औपचारिक छलफल नभइसकेको अवस्थामा बाहिरी हल्ला फैलाउनु अनुचित भएको टिप्पणी गरे।

ओलीको यो चेतावनीसँगै एमालेभित्र नेतृत्व प्रतिस्पर्धा र पूर्व नेतृ भण्डारीको सम्भावित पुनरागमनबारेको बहस थप चर्किन सक्ने संकेत देखिएको छ।