मुख्यमन्त्री यादवद्वारा मधेशवादी दल र नेताको उक्साहटमा नलाग्न प्रदेशवासीलाई आग्रह

जनकपुर। मधेश प्रदेशका मुख्यमन्त्री सरोज कुमार यादवले प्रदेशवासीका लागि सम्बोधन गरेका छन्। शनिबार विहान जनकपुरधामस्थित आफ्नो निजी निवासमा पत्रकारहरु समक्ष प्रदेशवासीका लागि सम्बोधन प्रस्तुत गरेका छन्।

सम्बोधनमा मुख्यमन्त्री यादवले मधेशवादी नेता र दलहरु सत्ताको खेलमा लागेकाले सम्पूर्ण प्रदेशवासीलाई सचेत हुने आग्रह गरे। उनले मधेशवादी दलहरुलाई जनता र प्रदेश देखि कुनै मतलब नरहेको बताए। मधेशवादी दलहरुले आम जनता र गरिबहरुलाई आन्दोलनको नाममा अझः बढी समस्या दिनेगरेकाले यसबाट उनीहरुको नियत प्रष्ट हुन गएको बताए।

कर्मचारी कुट्ने र राष्ट्रिय झण्डाको अपमान गर्नेहरु जनप्रतिनिधि हुन नसक्ने मुख्यमन्त्री यादवको भनाइ छ। मधेशी जनताले वास्तविक विकास प्रेमी र विकास बाधक कुन दलहरु हो भन्ने बुझ्न आवश्यक रहेको उनले बताए।

जसपा र लोसपाका सांसद एवम नेता कार्यकर्ताहरुले सुरक्षाकर्मी कुट्दै हिँडेकाले सुरक्षाकर्मीनै असुरक्षित रहेकोबेला प्रदेशको जनता जन कति सुरक्षित छन् भन्ने आंकलन गर्न सकिने उनले बताए।

यस्तो अवस्थामा चुनाव कसरी हुन्छ र संघीय सरकारले चुनाव हुने ग्यारेन्टी कसरी गर्न सक्छ भन्ने मुख्यमन्त्री यादवले प्रश्न गरे। पूर्व मुख्यमन्त्री जितेन्द्र सोनलले अझै मुख्यमन्त्रीकै कुर्सीमा बस्ने गरेको र अहिलेसम्म निवास र गाडीसमेत फिर्ता नगरेकोले आफूलाई नराम्रो लागेको बताए।

मेधशवादी दलहरुसँग चुनावका लागि कुनै एजेन्डा नरहेकाले उनीहरु मधेश र मधेशीको नाममा सोझा जनतासंग खेलवाड गर्दै हिँडेको मुख्यमन्त्री यादवले दाबी गरे।

मुख्यमन्त्री यादवले आफ्नो पार्टी नेकपा एमाले नेपाली कांग्रेस, माओवादी र नेकपा एससँग सरकार बनाउन आशावादी रहेको उल्लेख गरे। उनले अन्य प्रदेशहरुमा पनि यी पार्टीहरुका मानसिकता र काम गर्ने शैली प्रष्ट रहेकोले उनीहरुसँग समन्वय गरेर अगाडि बढ्न आशावादी रहेको बताए। मुख्यमन्त्री यादवले आफ्नो प्रतिस्पर्धा कुनै दलसँग नभई प्रदेशको गरीबि र प्रदेशको शिक्षाको अवस्थासंग रहेको बताए।

उनले मधेशवादी दहरुको अराजकताको विरोधमा मलाई साथ दिन सम्पूर्ण मधेशवासी, न्यायप्रेमी र बुद्धिजिवीहरुलाई आग्रह गरे। मुख्यमन्त्री यादवले भारतीय दुर्तावासका केही पदाधिकारी व्यक्तिहरुपनि मधेश प्रदेशमा आएर दल फोड्ने र तोड्नेमा लागेको आरोपसमेत लगाए।