दसैँ आयो, बेपत्ता श्रीमान् आएनन्

पवन अधिकारी विराटनगर । आज दसैँको महानवमी । गाउँ, घर सहर बजार सबैतिर दसैँको रमझम छ । विभिन्न उद्देश्यले टाढा टाढा पुगेका परिवारका सदस्य, आफन्त मूल घरमा भेला हुने क्रम जारी छ । भोलि विजयादशमीको टीका लगाउने दिन । अधिकांश नेपालीको घर आँगनमा यतिबेला उत्साह र उमंगको वातावरण छ । कतिपयका घरमा दुःख परेर अघिल्ला वर्षको जस्तो उत्साह नभए पनि भेला हुने र आफन्तबीच दुःख सुखका कुरा साटासट गर्ने परम्परा भने छँदैछ । यस्तो बेला साना तिना दुःख पनि बिर्सिइन्छ । तर विराटनगर–४ राजवंशी चोक घर भएकी ब्रजुना सुवेदी भने भुल्नै नसकिने पीडामा छिन् । बिवाह गरेको सात महिनामै बेपत्ता भएका श्रीमान दिलिप सुवेदी अझै फर्किएका छैनन् । ३६ दिनदेखि बेपत्ता श्रीमान्को कुनै अत्तोपत्तो नभएपछि उनलाई दसैँ आएको छैन । उनीसँगै परिवारको पनि अवस्था उस्तै छ । परिवारले दिलिपको खोजीमा सबै प्रयास केन्द्रित गर्यो । अझै पनि कतै छन् कि भनेर सोधखोज गरिरहेकै छन् । प्रहरीले पनि खोजी गरिरहेको बताएको छ । तर उनीबारे केही पनि जानकारी पाउन सकेका छैनन् । ‘सबैतिर दसैँ आयो’ ब्रजुना भन्छिन्, ‘अचानक सम्पर्कबिहीन हुनुभएका श्रीमान् अझै घर आउनुभएन, मेरालागि यो वर्षको दसैँ आएन ।’ बिवाह गरेको पहिलो वर्ष माइती, ससुराली र सबै आफन्तहरुकहाँ पुगेर टीका, जमरा अनि आशिर्वाद लिने उनीहरुको योजना थियो । यसै पनि बिवाहको पहिलो वर्ष सकेसम्म सबै आफन्तजनसँग भेटघाट गर्ने चलन छ । त्यसैअनुसार योजना बनाएका उनीहरु बिवाहपछिको पहिलो दसैँलाई अविश्मरणीय बनाउन चाहन्थे । ‘तर खै.. के भयो भयो..’ पाँच सातादेखि सातो हराएझैँ भएकी ब्रजुना भन्छिन्, ‘सपनामा नसोचेको भयो, कहाँ हुनुहोला, के अवस्था होला भनेर भोक न निद्रा भएकी छु ।’ झापाको सुरुङ्गास्थित नेपाल टेलिकमको कार्यालयमा निमित्त प्रमुखका रुपमा कार्यरत सुवेदी कार्यालयबाटै बेपत्ता भएका थिए । विराटनगर महानगरपालिका–४ राजवंशी चोकमा स्थायी घर भएका सुवेदी टेलिकमले उपलब्ध गराएको क्वाटरमा बस्दै आएका थिए । झापाको कनकाई नगरपालिका–३ सुरुङ्गाको नयाँ बस्तीस्थित क्वाटरबाट गत भदौदेखि उनी अचानक बेपत्ता भएका हुन् । बेपत्ता भएपछि परिवारले सम्भव भएसम्म सबैतिर खोजी गरे । प्रहरी गुहारे । तर अझैसम्म केही पत्तो लागेको छैन । इलाका प्रहरी कार्यालय बिर्तामोडका प्रहरी नायव उपरीक्षक सुरज कार्कीले प्रहरीका सबै युनिटहरुमा सुवेदीको तस्बिर पठाएर खोजतलास गरिरहेको बताए । श्रीमती ब्रजुना अझै पनि चिनेजानेसम्मका आफन्त, साथीभाइसँग सम्पर्क गरेर सोधीखोजी गरिरहेकी छिन् । प्रहरीमा पो केही जानकारी आयो कि भनेर त्यता पनि बुझ्ने गर्छिन् । तर केही सुइँको नपाउँदा आजित भइसकेकी छन् । श्रीमती भगवानसँग पनि बारम्बार प्रार्थना गरिरहन्छिन् । श्रीमानबारे केही न केही जानकारी आए हुन्थ्यो भन्ने उनलाई लागिरहन्छ । सुवेदीले प्रयोग गर्ने मोबाइल फोन बेपत्ता भएकै बेलादेखि ‘स्विच अफ’ छ । ब्रजुनाले त्यही फोन लागिहाल्छ कि भनेर सयौंपटक सम्पर्क गरिसकेकी छन् । ‘उहाँ सम्पर्कबिहीन भएको बेलादेखि नै फोन अफ छ’ भक्कानिँदै उनी भन्छिन्, ‘तर मन मान्दैन, अनि कतै लागिहाल्छ कि भनेर मेरा औंला उहाँको नम्बर डायल गर्न छाड्दैनन् ।’