इलाम गोल्ड कप एनआरटी काठमाडौँ फाइनलमा प्रवेश

इलाम, माघ : न्युरोड टिम (एनआरटी) काठमाडौ इलाममा जारी ‘प्रथम इलाम गोल्ड कप’ को फाइनलमा प्रवेश गरेको छ । आयोजक रेड हर्ष फुटबल क्लबलाई पाखा लगाउँदै एनआरटीले फाइनलको यात्रा तय गरेको हो । ठुलो टुँडिखेलमा जारी पहिलो सेमिफाइनलमा सडन डेथमा आयोजकलाई पछि पार्दै एनआरटी उपाधि नजिक अर्थात् फाइनलमा पुगेको छ । निर्धारित समयमा दुवै टिमबाट १–१ गोलको बराबरी भएको थियो । समय अभावका कारण सोझै आयोजकले टाइब्रेकरबाट नतिजा लिएको थियो । टाइब्रेकरमा पनि ३–३ गोलको बराबरी भएको थियो । एनआरटीले १३ गते शनिवार उपाधिका लागि बिहीबार हुने पाँचथर फुटबल क्लब र बिर्तामोड युनाइटेड क्लब झापाबिचको दोस्रो सेमिफाइनलको विजेतासँग प्रतिस्पर्धा गर्ने छ ।   खेलको म्यान अफ द म्याच विजेता एनआरटीका गोलकिपर थेभ्स प्रिसो घोषित हुँदै नगद पाँच हजार प्राप्त गरे । रेड हर्ष फुटबल क्लब इलामको आयोजनामा सञ्चालित गोल्डकपमा एक विदेशी टिमसहित ८ वटा टिमको सहभागिता रहेको छ । गोल्डकपको फाइनल माघ १३ गते शनिवार हुनेछ ।