प्रथम ओएसिस महिला गोल्ड कप : मानेभन्ज्याङ र दीपेन्द्र शिखर क्वाटर फाइनलमा प्रवेश 

टीका खतिवडा इलाम / भारतको मानेभन्ज्याङ फुटबल क्लब इलाममा जारी प्रथम ओएसिस महिला गोल्ड कपको क्वाटर फाइनलमा प्रवेश गरेको छ । आयोजक क्लब ओएसिसलाई एक गोलका विरुद्ध तीन गोल गर्दै मानेभन्ज्याङले अघिल्लो चरणको यात्रा तय गरेको हो । इलाममा बिहीबारबाट सुरु भएको पहिलो तथा उद्घाटन खेलमा जितका लागि मानेभन्ज्याङका तर्फबाट खेलको चौथो मिनेटमा सुस्मिता लेप्चाले पहिलो गोल गरिन् । लगत्तै नौ औँ मिनेटमा आयोजक क्लब ओएसिसका तर्फबाट जवाफी गोल जेनिफर राना मगरले गरिन् । रानाको एक मात्र गोलमा चित्त बुझाउँदै आयोजक पहिलो चरणबाट नै बाहिरिन पुग्यो । मानेभन्ज्याङका तर्फबाट खेलको २९ र ५४ मिनेटमा सोनिया मार्कको तर्फबाट थप दुई गोल भयो । सो गोलसँगै उसले दोस्रो चरणको यात्रा तय गर्‍यो । खेलको म्यान अफ दि म्याच दुई गोल गर्ने खेलाडी मार्क घोषित भइन् । उनले नगद दुई हजार समेत प्राप्त गरिन् । अर्को खेलमा दीपेन्द्र शिखर फुटबल क्लब विजेता बन्यो । उसले पीवाइसी पाँचथरलाई ट्राई ब्रेकरमा पछि पार्दै क्वाटर फाइनलको यात्रा तय गरेको छ । निर्धारित समयमा गोलरहित बराबरी भएपछि ट्राई ब्रेकरबाट नतिजा लिइएको थियो । जसमा चार गोलका विरुद्ध पाँच गोल गर्दै दीपेन्द्रले अघिल्लो चरणको यात्रा तय गरेको छ । जितका लागि दीपेन्द्रका तर्फबाट भावना राई, हिमा राउत, तुलसा बोहोरा, अनिशा राई र गोलरक्षक लीला जोशीले गरेको प्रहार गोलमा परिणत भयो । पाँचथरका तर्फबाट माया मास्के, सुत्रिया मिया, झुमा पोर्तेल र वर्षा ओलीको प्रहार गोलमा परिणत भयो । अन्जना पुन मगरको प्रहार पोस्ट माथिबाट गयो । अन्ततस् पाँचथरले प्रतियोगिताबाट आफ्नो यात्रा समाप्त गर्‍यो । खेलको म्यान अफ दि म्याच गोलरक्ष लीला जोशी घोषित भइन् । उनले नगद दुई हजार समेत प्राप्त गरिन् । शुक्रवार नवबुद्ध फुटबल क्लब यूथ फुटबल क्लब सप्तरी र युनाइटेड फुटबल क्लब देउमाई इलामबिच पहिलो खेल सञ्चालन हुने खेल आयोजक समितिका खेल संयोजक ध्रुव राईले जानकारी दिए । उनका अनुसार दोस्रो खेल पटना सिटी भारत र युनाइटेड बिर्तामोड बिच हुने छ । प्रतियोगिताको फाइनल खेल फागुन सात गते हुने आयोजक क्लब ओएसिसका अध्यक्ष चाङ मुखियाले बताए । खेलको प्रथम हुने टिमलाई नगद दुई लाख प्रदान गरिने आयोजक समितिका कोषाध्यक्ष रोशन राईले बताए । उनका अनुसार दोस्रो हुने टिमलाई नगद एक लाख प्रदान गरिने छ ।