एनपीएल खेल्न भारतीय क्रिकेटर शिखर धवन नेपालमा

काठमाडौँ : भारतीय क्रिकेटर शिखर धवन नेपाल आएका छन् । शनिबारदेखि सुरू हुन लागेको नेपाल प्रिमियर लिग (एनपीएल) खेल्न धवन आज (शुक्रबार) साँझ नेपाल आएका हुन् । धवनले एनपिएल टोली कर्णाली याक्सबाट खेल्नेछन् । उनलाई त्रिभुवन अन्तर्राष्ट्रिय विमानस्थलमा हिमालयन विल्डर्स एन्ड इन्जिनियर्सको स्वामित्वमा रहेको कर्णाली याक्सका मालिक झनकदत्त खनाल, सहमालिक गृहेन्द्र घिमिरेले स्वागत गरे । विमानस्थलमा सञ्चारकर्मीसँग धवनले आफू एनपीएल खेल्न पाउँदा उत्साहित भएको बताए । ३९ वर्षीय बायाँहाते ब्याटर धवन इन्डियन प्रिमियर लिग (आइपीएल)मा सनराइजर्स हैदरावादसँगै दिल्ली क्यापिटल्स, डेक्कन चार्जर्स र पञ्जाब किङ्सबाट खेलिसकेका छन् । सन् २०१६ मा धवन सम्मिलित हैदरावादले आइपीएलको उपाधि जितेको थियो ।