शेखरको असन्तुष्टिमा गगनको ‘अब्जेक्सन’ ! हेरौँ केही सवाल जवाफ

इटहरी : नेपाली काँग्रेसका नेता डा. शेखर कोइरालाले गत मङ्गलवार कोशी प्रदेशका आफ्ना समूहका पालिका सभापतिको भेलामा भनेका थिए, ‘सरकारले राम्रोसँग काम गर्न सकिरहेको मैले देखेको छैन ।’ सो भेलामा नेता कोइरालाले सरकारको मात्रै नभएर पार्टीको पनि आलोचना गरे । उनले आफू मात्रै होइन, सभामा बोल्नेहरूलाई पार्टी संस्थापन पक्षको आलोचना गर्न पनि उक्साए । विराटनगरको भेलामा मात्रै नभएर पछिल्लो समयका अधिकांश सार्वजनिक कार्यक्रमहरूमा डा. कोइरालाको वक्तव्य सरकार र पार्टीको आलोचना केन्द्रित नै छ । सुरुवातमा एमाले काँग्रेसको गठबन्धन बन्नुपर्ने जोड दिएका कोइराला काँग्रेस एमालेको सहमति कार्यान्वयन नभएको प्रति असन्तुष्ट छन् । तर, उनी वक्तव्यको पछाडि थप्छन्, ‘सरकारलाई घच्घच्याउने पनि गर्नु पर्दछ ।’ नेता कोइराला शनिवार आफ्नै प्रदेशको सम्मेलन आफ्नै गृह नगरमा हुँदा समेत उपस्थित भएनन् । तर त्यहाँ केन्द्रीय सदस्य राजीव कोइराला लगायतले डा. शेखरको खोजीसमेत गरे । कोइरालाले भनेका थिए, यहाँ माननीय डा.शेखर कोइराला भएको भए अझ सु–शोभित हुन्थ्यो होला ।’ शेखर कोइराला भने वरियाता क्रममा असन्तुष्टि जनाउँदै बाग्मती प्रदेशको चितवनका कार्यक्रममा गएका थिए । यसरी काँग्रेसको कोशी सम्मेलनमा कोइरालाको बहिष्कार र खोजी र आलोचनाले पार्टीभित्रको असन्तुष्टि बढ्दै गएको देख्न सकिन्छ । १४ औँ महाधिवेशनमा एउटै समूहबाट चुनाव लडेर महामन्त्री जितेका गगन कुमार थापाले कोशी प्रदेशको सम्मेलनमा डा.कोइरालाले यसअघि गरेका आलोचनाका सन्दर्भमा घुमाउरो तरिकाले आपत्ति नै जनाए । पछिल्लो समय देउवासँग नजिकिएका थापा र कोइरालाका केही सवाल जवाफ हेरौँ । जसले कोइराला र थापाको सम्बन्धमा चिसोपना बढ्दै गएको भन्ने अनुमान लगाउन सकिन्छ । हेरौँ केही सवाल जवाफ :  डा. शेखर कोइराला (सभापतिहरूको भेलामा) : ‘सरकारले जुन ७ बुँदे सहमति अनुसार काम गर्नुपथ्यो त्यो गर्न सकिरहेको छैन । संविधान संशोधनका बारेमा छलफल समेत भइरहेको मैले देखेको छैन ।’ गगनकुमार थापा (प्रदेश सम्मेलनमा) : ‘संविधान संशोधनको विषय कता हरायो होइन । भ्रममा नपरौँ हामीले संविधान संशोधनका बारेमा काँग्रेस र एमालेका बिच राम्रोसँग छलफल अगाडि बढाएका छौँ । संविधान अनुसारका १० वटाभन्दा बढी कानुन बनाउनु पर्ने छ । अबका केही बैठकपछि हामी औपचारिक दिने तरखरमा छौँ ।’ डा. शेखर कोइराला (सभापतिहरूको भेलामा) : १५ औँ महाधिवेशन समयमा हुने छाँटकाँट देखिरहेको छैन । हामीले यसको लागि दबाब दिनुपर्ने छ । क्रियाशील नवीकरण र नयाँ सदस्यतामा अझैँ समाधान गर्न सकिएको छैन ।’ गगनकुमार थापा (प्रदेश सम्मेलनमा) : हामीले इतिहासमै पहिलो पटक क्रियाशीलता नवीकरणको कुरामा राम्रोसँग काम गरिरहेका छौँ । सदस्यतामा कामै भएन भन्ने कुरा गलत हो । डा. शेखर कोइराला (चितवनका पत्रकारसँग) : रवि लामिछानेलाई जसरी रातारात पोखरा लगिएको छ, यो न्यायोचित लाग्दैन मलाई यहाँ मानव अधिकारका कुराहरू पनि जोडिएको छ नि १’ गगनकुमार थापा (प्रदेश सम्मेलनमा) : ‘नेकपा एमाले र काँग्रेसको सरकारले सुशासन ल्याउनका लागि निर्दोष फस्नु हुन्न दोषी उम्कनु हुन्न भन्ने मान्यताका साथ काम गर्नुपर्दछ र जनतामा आशा जगाउनुपर्दछ ।’ शेखर कोइरालाको नेतृत्वमा भएको पालिका सभापतिहरूको भेलाका सन्दर्भमा पनि गगनको ‘अब्जेक्सन’ थियो । ‘पार्टीभित्र एकता अनिवार्य छ । सबैको राजनीतिक हिसाबले मिलाउनुपर्छ । केही समय अगाडि रुपन्देहीको क्षेत्रले पनि भनेको थियो म देशभरका क्षेत्रीय सभापतिहरूलाई बोलाउँछु । हामीले भन्यौँ आयोजक केन्द्रीय समिति बन्छ । संयोजन गर्ने हो भने ठिक छ । कास्की जिल्लाले पनि सबै जिल्लाका सभापतिको भेला राख्छु भनेको थियो । तर, हामीले केन्द्रीय समितिको आयोजना र जिल्लाको व्यवस्थापनमा हो भने ठिक छ भन्यौ,’ थापाले भने, ‘विराटनगरको आयोजनामा प्रदेशमा पालिका भेला गरियो । यो पनि ठिक भएन भन्ने लागेको हो । भोली विराटनगरको एउटा वडाले सबै वडाध्यक्ष बोलाएर गर्छु भन्यो भने महानगरले के गर्छ ? त्यो भेला गर्ने कि नगर्ने ? त्यस कारण सबै मिलेर सम्हालिएर अगाडि बढौँ ।’ माथि उल्लेखित शेखर गगनका नोकझोकका विषयले उनीहरूको सम्बन्धमा चिसोपना पस्दै गएको अनुमान समेत लगाउन सकिन्छ । डा. कोइरालाले १५ औँ महाधिवेशनमा आफू जसरी पनि सभापति उठ्ने बताउँदै आएका छन् । महामन्त्ती गगन थापा पनि सभापति उठ्न सक्नुहुन्छ नि ? भन्ने वक्तव्यले पनि शेखर गगन समूहबाट उनीहरू अलग भएका हुन् भन्ने देख्न सकिन्छ । अर्कोतर्फ काँग्रेस सरकारमा होस या पार्टीमा एक धारणा बनाएर अगाडि बढ्न नसकिरहेको स्पष्ट हुन्छ । आङ्देम्बे जब भक्कानिए... पार्टी एकजुट हुन नसकेको र आफ्नो विरासत भुल्दै गएको प्रति काँग्रेस सहमहामन्त्री भीष्मराज आङ्देम्बे भने प्रदेश सम्मेलनमा बोल्दै गर्दा भक्कानिए । ‘म क्षमा चाहन्छु सभापति ज्यू । म क्षमा चाहन्छु डाक्टर शशाङ्क कोइरालाज्यू । इतिहासले बुढानिलकण्ठलाई त्यो जिम्मेवारी दिएन । इतिहासले चाबहिलले त्यो विरासत बोक्दैन । बुढानिलकण्ठमा पाँच चोटि प्रधानमन्त्री होइन, ६ चोटि बन्नुहुन्छ शङ्का छैन । तर, इतिहासले बुढानिलकण्ठलाई त्यो विरासत आफ्नो सम्झिएन ।’ तर, कोइराला निवास र चाक्सीबारीलाई आफ्नो इतिहासको विरासत सम्झिएको उनले बताए । आङ्देम्बेले भने, ‘प्रत्येक नेपाली काँग्रेसका कार्यकर्ताहरूले आफ्नो विरासत सम्झिन्छ । त्यसले गर्दा त्यो ठाउँबाट व्यक्त भएका विचारहरू काँग्रेसको किन बन्न सकिरहेको छैन,’ उनले थपे, ‘लिम्बु भावुक बनेको त राम्रो हैन ।’ पूर्व महामन्त्री कृष्ण सिटौलाले समेत कोइरालाले सम्मेलनमा आफ्ना कुरा राखेको भए उपयुक्त हुने बताएका थिए । ‘शेखर दाइले यहीँ कुरा राख्नुभएको हुन्थ्यो ? किन बहिष्कार गर्नुपथ्यो र !’ उनले भने । प्रदेश सम्मेलनलाई सम्बोधनको क्रममा संस्थापन पक्षका नेताहरूले पार्टीमा विधान विपरीतका क्रियाकलाप बढ्दै गएको उल्लेख गरेका थिए । पार्टीले कार्यक्रम होइन, भएको कार्यक्रमलाई शेखर कोइरालाले सम्बोधन गरेको लक्षित गर्दै नेता मीन विश्वकर्माले भने, ‘विधान पालना भएन कि भन्ने कुरा छ । काँग्रेसले किन राम्रो काम गरेन ? गरेको कामबारे किन भन्न सकेनौँ भन्ने प्रश्न छ । ’ सम्बोधनका क्रममा नेता ज्ञानेन्द्र कार्कीले कोइराला पक्षले विधि, विधान र अनुशासनलाई टेक्न खोजेको र आफू अनुकूल व्याख्या गरेको बताउँदा नेत्री सीता गुरुङले विधानमा केन्द्रित नभएर हिँड्दा बीपीको विचार र भावनामाथि कुठाराघात हुने उल्लेख गरिन् । कार्यक्रमका अधिकांश वक्ताहरूले काङ्ग्रेसकै गुट उपगुटका बारेमा चर्चा गरे । देउवाले एकताको सन्देश दिएका हुन् ? प्रदेश सम्मेलनको प्रमुख अतिथि रहेका काँग्रेस सभापति शेरबहादुर देउवा प्रदेश सम्मेलन हुनुपूर्व कोइराला निवासमा पुगेका थिए । [caption id="attachment_76276" align="alignnone" width="1080"] डा. कोइराला निवासमा सभापति शेरबहादुर देउवासहित सशांक कोइराला ।[/caption] बीपी पुत्र शशाङ्क कोइरालाको साथमा निवास पुगेका देउवाले त्यहाँ चिया समेत पिएका थिए । कोशीमा छरपस्ट देखिएको संस्थापन र इतर समूहको कलहलाई छायाँमा पार्न देउवा त्यहाँ पुगेको राजनीतिका जानकारहरू बताउँछन् । कोइराला निवासमा डा. शेखर कोइराला बस्दै आएका छन् । कोशीको सम्मेलनलाई बहिष्कार गरेका शेखर चितवन जाँदै थिए । देउवालाई भने शेखरकी पत्नी पुनम कोइरालाले स्वागत गरेकी थिइन् । यसले पनि देउवाले कांग्रेसभित्र एकताको सन्देश दिएको जानकारहरूको भनाइ छ । यो पनि - कांग्रेस कोशीको सम्मेलनमा कुन नेताले के बोले ? यो पनि - विराटनगरमा नेपाली कांग्रेसका डा. शेखर कोइराला समूहको भेला : कुन नेताले के भने ?

• लेखकका अन्य सामाग्र पढ्न यहाँ क्लिक गर्नुहोस्