पेट्रोलमा ५ र डिजेल/मट्टितेलमा ४ रुपैयाँ बढ्यो

काठमाडौं : नेपाल आयल निगमले पेट्रोल, डिजेल र हवाई इन्धनको मूल्य बढाएको छ।

भारतीय आयल कर्पोरेसन (आईओसी) बाट नयाँ खरिद मूल्य बढेर आएपछि निगमले सोमबार मध्यरातदेखि लागू हुने गरी मूल्य समायोजन गरेको हो।

निगम सञ्चालक समितिको निर्णयअनुसार, पेट्रोलमा प्रतिलिटर ५ रुपैयाँ र डिजेल/मट्टितेलमा प्रतिलिटर ४ रुपैयाँले मूल्य वृद्धि भएको छ।

यद्यपि, खाना पकाउने एलपी ग्यासको खुद्रा बिक्री मूल्य भने यथावत् राखिएको छ।

निगमका अनुसार, आईओसीबाट आइतबार प्राप्त नयाँ मूल्य सूचीमा पेट्रोलमा प्रतिलिटर ७.६४ रुपैयाँ, डिजेलमा ९.१३ रुपैयाँ र हवाई इन्धनमा ६.८८ रुपैयाँले बढेर आएको थियो।

खरिद मूल्यमा भारी वृद्धि भए पनि उपभोक्ताको हितलाई ध्यानमा राख्दै आंशिक रूपमा मात्र मूल्य समायोजन गरिएको निगमले जनाएको छ।