बीमा प्राधिकरणको अध्यक्षमा पोखरेल, अर्को व्यवस्था नभएसम्म सम्हाल्नेछन् नेतृत्व

काठमाडौँ : फर्जी कागजात प्रयोग गरेको आरोपमा बीमा प्राधिकरणका कार्यकारी अध्यक्ष शरद ओझा निलम्बनमा परेका छन् ।

निलम्बनपछिको रिक्ततामा अर्थ मन्त्रालयका सहसचिव सेमन्तक पोखरेललाई प्राधिकरणको कार्यकारी अध्यक्षको जिम्मेवारी दिइएको छ ।

शरद ओझाले पदपूर्तिका क्रममा योग्यता प्रमाणित गर्न पेस गरेको शैक्षिक योग्यताको कागजातबारे गम्भीर शङ्का उठेपछि छानबिनका लागि उनलाई पदबाट निलम्बन गरिएको हो ।

उनीमाथि फर्जी शैक्षिक प्रमाणपत्र पेस गरेको उजुरी परेपछि सरकारी तहमा अनुसन्धान अघि बढाइएको हो ।

अर्थ मन्त्रालय स्रोतका अनुसार स्थायी अध्यक्ष नियुक्ति नहुँदासम्म पोखरेलले प्राधिकरणको नेतृत्व गर्नेछन् ।

पोखरेल हाल अर्थ मन्त्रालयको वित्तीय क्षेत्र व्यवस्थापन महाशाखामा कार्यरत छन् र बीमा तथा वित्तीय क्षेत्रको अनुभवसमेत राख्दछन् ।

बीमा प्राधिकरणको नेतृत्व तहमै देखिएको यस्तो विवादले समग्र बीमा क्षेत्रमा नकारात्मक प्रभाव पर्न सक्ने भन्दै सरोकारवाला पक्षले यसमा छिटो र पारदर्शी निर्णय हुनुपर्ने माग गरेका छन् ।